शिरपूर जि.प. उर्दू शाळेच्या व्हरांड्याचा स्लॅब कोसळला

शिरपूर येथील गुजरी चौकात जि. प.ची उर्दू मुलांची शाळा आहे. या शाळेत पहिली ते सातवीपर्यंत १६९ विद्यार्थी संख्या आहे. या शाळेत आधीच मोठ्या प्रमाणात समस्या आहेत. वर्गखोलीत भरदिवसा अंधकारमय वातावरण राहत असल्याचे पालकांचे मत आहे. तसेच पावसाळ्यात शाळेच्या प्रांगणात मोठ्या प्रमाणात पाणी साचते. हे पाणी मुख्याध्यापकांच्या कार्यालयातही शिरते. त्यातच गुरुवार १२ ऑगस्ट रोजी या उर्दू शाळेतील वर्ग खोल्यांकडे जाणाऱ्या मार्गातील व्हरांड्याचा स्लॅब अचानक कोसळला. दरम्यान, कोरोना पार्श्वभूमीवर अद्याप शाळा सुरू करण्यात आल्या नसल्याने मोठा अनर्थ टळला. १५ व्या वित्त आयोगातून आरोग्य व शिक्षणासाठी मोठ्या प्रमाणात निधी उपलब्ध होत असताना या शाळेच्या समस्या दूर होऊ शकल्या नाहीत.

------

पंचायत समिती सदस्यांनी केली पाहणी

घटनेची माहिती मिळाल्यानंतर पंचायत समिती सदस्य शकिलखा पठाण, शाळा व्यवस्थापन समिती सदस्य तथा पालकांच्या वतीने यांनी शाळेला भेट देऊन पाहणी केली. दरम्यान, या समस्या दूर करण्यासाठी शाळा व्यवस्थापन समितीचे सदस्य तथा पालकांच्या वतीने अ.मुकीम आ.हकिम यांनी १३ ऑगस्ट रोजी जिल्हा परिषद मुख्य कार्यकारी अधिकारी, जिल्हा परिषद प्रभारी अध्यक्ष तथा गटविकास अधिकारी मालेगाव यांना निवेदन दिले आहे.