गौण खनिजातून १६ कोटींचा महसूल

वाशिम- गौण खनिजाची वाहतूक करणाऱ्या शेकडो वाहनांवर कारवाईचा आसूड ओढून महसूल प्रशासनाने १६ कोटी २ लाख रुपयांचा महसूल शासनाच्या तिजोरीत जमा केला आहे.

वाशिम: शासनाची कोणतीही परवानगी न घेता चोरट्या मार्गाने रेती, मुरूम, गिट्टी आदी गौण खनिजाची वाहतूक करणाऱ्या शेकडो वाहनांवर कारवाईचा आसूड ओढून महसूल प्रशासनाने १६ कोटी २ लाख रुपयांचा महसूल शासनाच्या तिजोरीत जमा केला आहे. एप्रिल २०१६ ते ३१ मार्च २०१७ या दरम्यानच्या कारवाईचा हा लेखाजोखा आहे.
गौण खनिजाचा खरेदी-विक्रीचा व्यवहार करण्यापूर्वी शासनाची परवानगी घेणे बंधनकारक आहे; मात्र अनेक जण शासनाची परवानगी न घेता चोरट्या मार्गावर बिनधास्त गौण खनिजाची वाहतूक करीत असल्याचे वास्तव आहे. गौण खनिजाची अवैध वाहतूक रोखण्यासाठी प्रत्येक तहसील कार्यालय आणि गौण खनिज कार्यालयाचे पथक कारवाई करते. एप्रिल २०१६ ते ३१ मार्च २०१७ या दरम्यान जिल्ह्यात शेकडो वाहने गौण खनिजाची अवैध वाहतूक करताना पकडण्यात आली. या वाहतूकदारांकडून १६ कोटी २ लाख रुपयांचा दंड वसूल करण्यात आला आहे. जिल्ह्यात काही प्रमाणात निसर्गसंपदा असल्याने गौण खनिज साठा उपलब्ध आहे.