तलाठ्यांअभावी कामकाजाचा खोळंबा

..................

पशू दवाखाना इमारतींची दुरवस्था

वाशिम : पशुसंवर्धन विभागांतर्गत जिल्हाभरात आठ ठिकाणी पशू दवाखाने कार्यान्वित आहेत. या दवाखान्यांच्या इमारतींची अवस्था मात्र अत्यंत वाईट झाली आहे. त्यामुळे पशुपालकांसह कार्यरत कर्मचाऱ्यांना उपचारकार्यात अडचण निर्माण झाली असून, संबंधित यंत्रणेने या समस्येकडे लक्ष देण्याची मागणी होत आहे.

...................

जि.प.मध्ये नो-पार्किंग नियमाचे उल्लंघन

वाशिम : येथील जिल्हा परिषदेच्या कार्यालय परिसरात वाहने उभी करण्यासाठी टिनशेडसह पुरेशी जागा निश्चित करण्यात आली आहे; परंतु या ठिकाणी मोजकेच नागरिक वाहने उभी करतात. इतर अनेक नागरिक नियमांचे उल्लंघन करून प्रवेशद्वारासमोरच वाहने उभी करत असल्याचे पाहावयास मिळत आहे.

..................

कनेक्टिव्हिटीअभावी अनसिंगवासी त्रस्त

वाशिम : ग्रामीण भागात विविध मोबाईल कंपन्याचे टाॅवर उभे असतानादेखील योग्य प्रमाणात इंटरनेट नेटवर्क मिळत नसल्याने मोबाईलधारक त्रस्त झाले आहेत. त्यामुळे विशेषत: बँकांचे व्यवहार प्रभावित होत आहेत. याकडे संबंधितांनी लक्ष देण्याची मागणी होत आहे.

.............

वाशिम-केकतउमरा रस्ता प्रश्न प्रलंबित

वाशिम : वाशिम येथून केकतउमरा या गावाकडे जाणाऱ्या रस्त्याची दुरवस्था झाली आहे. या रस्त्यावर ठिकठिकाणी मोठमोठे खड्डे पडले असून, पावसाळ्यापूर्वी रस्त्याची डागडुजी करावी, अशी मागणी गावकऱ्यांकडून करण्यात आली होती; मात्र त्याकडे दुर्लक्ष करण्यात आले. हा प्रश्न आजही प्रलंबित असून ग्रामस्थांमधून रोष व्यक्त होत आहे.

..............

क्रीडा संकुल उभारणीची मागणी

वाशिम : कोरोना विषाणू संसर्गाच्या संकटामुळे अनेक महिने मैदानी खेळांवर निर्बंध लादण्यात आले होते. गेल्या काही दिवसांपासून हे निर्बंध शिथिल झाल्याने खेळाडूंना दिलासा मिळाला. आता तालुका स्तरावर क्रीडा संकुल उभारणीच्या कामालाही गती मिळावी, अशी मागणी खेळाडूंमधून होत आहे.

.......................

दुर्धर आजारग्रस्त मदतीच्या प्रतीक्षेत

रिसोड : हृदयरोग, किडनी व कर्करोग, आदी दुर्धर आजाराने पीडित लाभार्थ्यांना औषधोपचाराकरिता जि.प.च्या आरोग्य विभागातर्फे प्रत्येकी १५ हजारांचे अर्थसाहाय्य दिले जाते. सन २०२० मध्ये २७ प्रस्ताव मंजूर झाले असून, संबंधितांना मदतीची प्रतीक्षा लागून आहे.

................

स्मशानभूमींसाठी अतिरिक्त निधीची प्रतीक्षा

वाशिम : जिल्हा वार्षिक योजनेंतर्गत स्मशानभूमी आणि ग्रामपंचायत भवन उभारण्याकरिता १५ कोटींचा अतिरिक्त निधी मिळणार आहे; मात्र हा प्रश्न अनेक महिन्यांपासून मार्गी लागलेला नाही. यामुळे कामेही प्रलंबित आहेत. विशेषत: सुसज्ज स्मशानभूमी नसल्याने अनेक गावांमधील ग्रामस्थ हैराण झाले आहेत.

..............

कोरोनापासून बचावासाठी खबरदारी घ्या!

वाशिम : कोरोनाचे संकट बहुतांशी निवळले आहे; मात्र संकटाचा धोका अद्यापही कमी झालेला नाही. या पार्श्वभूमीवर नागरिकांनी कुठलीच हयगय न करता कोरोनापासून बचावासाठी आवश्यक सर्व खबरदारी घ्यावी, असे आवाहन जिल्हा प्रशासनाकडून करण्यात आले.