कारखेडा ग्रामपंचायत करणार शिक्षकांचा सत्कार

मानोरा तालुक्यातील उत्कृष्ट, सर्जनशील, उपक्रमशील शिक्षकांचा गौरव, सन्मान व्हावा या हेतूने कारखेडा ग्रामपंचायत अशा शिक्षकांचा दरवर्षी ५ सप्टेंबरला डॉ. सर्वपल्ली राधाकृष्णन यांच्या जन्मदिनी म्हणजेच शिक्षक दिनी भव्य सत्कार सोहळा आयोजित करून अशा शिक्षकांचा सत्कार व सन्मान करते. यंदाही अशा शिक्षकांचा सत्कार व सन्मान करण्यासाठी ग्रामपंचायतीने शिक्षकांची निवड केली आहे.

प्राथमिक विभागातून वक्तशीरपणा आणि नियमितपणासाठी जि. प. प्राथमिक शाळा यशवंत नगरचे पुंडलिक किसनराव राऊत, तसेच जिल्ह्यातून पहिली आयएसओ शाळा करणारे उमेश शेषराव हाके, सहायक शिक्षक, जि. प. शाळा माहुली यांची नावे जाहीर झालेली आहेत.

माध्यमिक विभागातून दुर्गम भागातील शाळा असूनही गुणवत्ता वाढविणारे श्री वसंतराव नाईक विद्यालय पाळोदीचे मुख्याध्यापक वसंत गोविंद चव्हाण व शाळेला सर्वस्व समजणारे श्री अंबिका विद्यालय गव्हा येथील शिक्षक विजय सुखदेव मनवर यांची निवड झालेली आहे.

मुलींच्या कबड्डी संघाला राष्ट्रीय स्तरापर्यंत नेणारे इंदिरा गांधी कन्या विद्यालयाचे क्रीडाशिक्षक श्याम वानखडे यांची क्रीडा विभागातून निवड झालेली आहे.

कनिष्ठ महाविद्यालयीन विभागातून प्रा. अनिस अहमद अन्सारी रहेमानिया कनिष्ठ उर्दू महाविद्यालय, मानोरा यांची निवड झालेली आहे.

उच्च महाविद्यालयीन विभागातून महाविद्यालयात प्राणीशास्त्र या विषयासंबंधी नावीण्यपूर्ण उपक्रम राबविणाऱ्या डॉ. सीमा वीरभान केशवानी मातोश्री सुभद्राबाई पाटील महाविद्यालय मानोरा यांची निवड झालेली आहे.

००००००००००००००००००

तहसीलदारांच्या हस्ते होणार सन्मान

उत्कृष्ट कार्य करणाऱ्या शिक्षकांना शिक्षक दिनाच्या औचित्यावर तहसीलदार शारदा जाधव, ठाणेदार सुनील जाधव, गटशिक्षणाधिकारी अनिल पवार यांच्या हस्तेकारखेडा ग्रामपंचायत सरपंच सोनाली बबनराव देशमुख व उपसरपंच अनिल काजळे, तसेच ग्रामपंचायत सचिव सूर्य यांचे स्वाक्षरी असलेले सन्मानपत्र दिले जाणार आहे.