लायन्स क्लब मिडटाऊनचा पदग्रहण समारंभ

रिसाेड : लायन्स क्लब ऑफ रिसोड मिडटाऊनचा पदग्रहण समारंभ ५ सप्टेंबर राेजी येथील तोतला हाॅलमध्ये संपन्न झाला. या कार्यक्रमाच्या अध्यक्षस्थानी रिसोड लायन्स क्लबचे अध्यक्ष ला. डॉ. मधुकर देशमुख, तर प्रमुख अतिथी म्हणून पदग्रहण अधिकारी रिजन चेअरपर्सन वाशिमचे नितीन करवा, मनीष तोष्णीवाल, नवनिर्वाचित अध्यक्ष मंगेश साखरे, ज्येष्ठ सदस्य कमलकाका बगडे, डॉ. दिलीप धोपे मंचावर उपस्थित होते.

कार्यक्रमाच्या सुरुवातीस लायन्स क्लबचे संस्थापक मेलविन जोन्स यांच्या प्रतिमेचे पूजन व दीप प्रज्वलन प्रमुख मान्यवरांच्या हस्ते संपन्न झाले. लायन्स क्लबचे कॅबिनेट ऑफिसर स्व. विश्वनाथ तायडे, तसेच अनंत हराळकर यांचे निधन झाल्यामुळे त्यांना यावेळी श्रद्धांजली अर्पण करण्यात आली. डॉ. विजय प्रसाद तिवारी यांनी ध्वजवंदना सादर केली. यावेळी उपस्थित मान्यवरांचा शाल, श्रीफळ व पुष्पगुच्छ देऊन सत्कार करण्यात आला. रिजन चेअरपर्सन लायन नितीन करवा यांनी नवनिर्वाचित अध्यक्ष मंगेश साखरे व त्यांच्या नवीन कार्यकारिणीला शपथ दिली. ५ सप्टेंबरला शिक्षक दिन असल्यामुळे शहरातील ज्येष्ठ शिक्षकांचा उपस्थितीत मान्यवरांच्या हस्ते सत्कार करण्यात आला. यामध्ये प्रामुख्याने भारत माध्यमिक शाळा व कनिष्ठ महाविद्यालयाचे प्राचार्य राजेश नंदकुले, श्री शिवाजी हायस्कूल व कनिष्ठ महाविद्यालयाचे प्राचार्य मोहम्मद आरीफ, राजस्थान माध्यमिक विद्यालयाचे प्राचार्य विवेकानंद ठाकरे, उत्तमचंद बगडिया महाविद्यालयाचे प्राचार्य तथा ज्येष्ठ सदस्य प्राचार्य विजयकुमार तुरुकमाने यांचा यावेळी सत्कार करण्यात आला, तसेच लायन्स क्लबमध्ये वीस वर्षे ज्यांची सेवा झाली त्यांना इंटरनॅशनल लायन्स क्लबकडून आलेल्या पिनचे वाटप उपस्थित मान्यवरांच्या हस्ते करण्यात आले. याप्रसंगी ला. मनीष तोष्णीवाल, प्राचार्य राजेंद्र नंदकुले यांची समयोचित भाषणे झाली. नवनिर्वाचित अध्यक्ष ला. मंगेश साखरे यांनी पदभार स्वीकारल्यानंतर मनाेगत व्यक्त करून सर्व लायन सदस्यांनी सहकार्य करण्याचे आवाहन यावेळी केले. कार्यक्रमाचे संचलन संतोष वाघमारे यांनी केले, तर आभार डॉ. तिवारी यांनी मानले. या कार्यक्रमास लायन्स क्लबचे सर्व सदस्य, पदाधिकारी व आमंत्रित उपस्थित होते.

080921\img-20210908-wa0205.jpg

लॉयन्स क्लब ऑफ रिसोड मिडटाउनचा पदग्रहण समारंभ