पर्यावरण क्षेत्रात १२ वेळा महाराष्ट्र शासनाचा पुरस्कार मिळालेले शिक्षक जाेशी

नंदकिशोर नारे

वाशिम : पर्यावरण क्षेत्रातील बहुमूल्य योगदान, वृक्षारोपण व संवर्धनात उल्लेखनीय कार्य करणारे शिक्षक वाशिम शहरातील एस.एम.सी. इंग्लिश स्कूलमध्ये असून त्यांचे नाव आहे अभिजित जाेशी. त्यांनी पर्यावरण क्षेत्रात केलेल्या उत्कृष्ट कार्याबद्दल शासनाने १२ वेळा त्यांना पुरस्कार देऊन सन्मानित केले आहे. शिक्षक दिनानिमित्त या शिक्षकाच्या कार्याला सलाम. पर्यावरणासाठी आपले जीवन समर्पित करणाऱ्या या शिक्षकाने आगळे वेगळे उपक्रम राबवून पर्यावरणाचा ऱ्हासही थांबविला आहे.

जाेशी यांनी राष्ट्रीय हरित सेनेच्या कार्याची सुरुवात २००९ मध्ये केली. सामाजिक वनीकरण विभागच्यावतीने हरित सेनेचे समन्वयक म्हणून त्यांची निवड झाली व त्याच वर्षी सामाजिक वनीकरण विभाग वाशिमच्या वतीने कार्यशाळेचे आयोजन केले. त्यानंतर एस.एम.सी. इंग्लिश स्कूल वाशिमचा राष्ट्रीय हरित सेनेचे समन्वयक म्हणून या कार्यशाळेत उपस्थित झाले. जाेशी यांना लहानपणापासूनच वृक्षलागवड व संवर्धनाची आवड होती. त्यातच या कार्यशाळेत पर्यावरण क्षेत्रातून आलेल्या तज्ज्ञ मार्गदर्शकांनी केलेले मार्गदर्शन यामुळे पर्यावरणाचा होणारा ऱ्हास आपण कसा थांबवू शकतो याचे विचार मनात घोळायला लागला व त्यातूनच त्यांनी कार्याला सुरवात केली ती आजवर अविरत सुरू आहे.

-----

पर्यावरण क्षेत्रातील राबविलेले उपक्रम ....

वृक्ष वाचविण्यासाठी संक्रांतीच्या सुगड्यांचा वापर, श्रावणमासात महादेवाच्या मंदिर परिसरात बेल वृक्षारोपण, पर्यावरणपूरक होळी -नैसर्गिक रंग निर्मिती व जनजागृती, वृक्ष वाचविण्यासाठी बिहार पॅटर्नचा अवलंब, सिड बँकेची निर्मिती,पर्यावरण पूरक दसरा शमी व आपटा वृक्षांचे वाटप व वृक्षारोपण, जागतिक भूगोल दिन प्रभातफेरीचे आयोजन,रस्त्यावरील रोड द्विभाजकावर वृक्षारोपण.

रेनवाॅटर हार्वेस्टिंगसह राबविलेले विविध प्रकल्प ....

विविध उपक्रमासाेबतच शिक्षक अभिजित जाेशी संरानी विविध प्रकल्प उभारले. त्यातील काही महत्त्वाच्या प्रकलपमध्ये रेन वॉटर हार्वेस्टिंग, सौर ऊर्जा प्रकल्प, गांडूळ खत प्रकल्प, बहार रोपवाटिका, नक्षत्र वन, अटल आनंद घन वन योजना (आनंद घन वनमध्ये २५ बाय १०च्या बेडमध्ये ७५० वृक्षांची लागवड) राशीवर उद्यान :राशीनुसार वृक्षांची लागवडीचा समावेश आहे.

या गुरुवर्यांचे व मान्यवरांचे लाभले जीवनात सहकार्य...

पर्यावरण क्षेत्रात कार्य करताना एस.एम.सी. शिक्षण प्रसारक मंडळाचे अध्यक्ष प्रा. हरिभाऊ क्षीरसागर, प्राचार्य मीना उबगडे, पवन खंडेलवाल, शाळेतील माळी विशाल भंगी, शाळेतील शिक्षक व शिक्षकेतर कर्मचारी तसेच सामाजिक वनीकरण विभागाचे विभागीय वन अधिकारी लक्ष्मण पाटील, सहायक वन संरक्षक यु.म. फड, उपवनसंरक्षक वन विभागाचे सुमंत सोळंके, सहायक वन संरक्षक किशोर येथे, वन परिक्षेत्र अधिकारी मंगेश बाळापुरे, जन्मजय जाधव, आर. जी. रत्नपारखी, संजय नांदूरकर, हिराकांत अंभोरे वाहन चालक सामाजिक वनीकरण यांचे मोलाचे सहकार्य लाभल्याचे जाेशी सांगतात.