मंगरूळपीर येथे पोषण महोत्सव अभियान उत्साहात

मंगरूळपीर : तालुक्यातील नवीन सोनखास येथील विठ्ठल- रुक्मिणी मंदिरात २२ सप्टेंबर रोजी सकाळी ११ वाजता पोषण महोत्सव अभियान महिला मान्यवरांच्या उपस्थितीत मोठ्या उत्साहात राबविण्यात आले.

या कार्यक्रमाच्या अध्यक्षस्थानी उपसरपंच आशाताई महाकाळ, तर प्रमुख पाहुणे म्हणून गटशिक्षणाधिकारी सुभाष पवने, ग्रामसेवक पंडित राठोड, सचिन सुर्वे, सुभाष गोटे, अमित इंगोले, पर्यवेक्षिका लताताई चौधरी, अनिता भोयाळकर आदी मान्यवरांची उपस्थिती होती.

यावेळी सर्वप्रथम मान्यवरांच्या हस्ते राजमाता जिजाऊ व सावित्रीबाई फुले यांच्या प्रतिमेचे पूजन करून हारार्पण करण्यात आले. यावेळी पर्यवेक्षिका चौधरी यांनी महिला व बालकांचे आरोग्यपूर्ण जीवनमान उंचावण्यासाठी शासन विविध उपक्रम राबविते, या उपक्रमांची माहिती व्हावी यासाठी हा पोषण महोत्सव साजरा करण्यात येत आहे, यामध्ये महिलांनी आपले व आपल्या बालकांचे आरोग्य सुदृढ राहण्यासाठी कोणता आहार घेणे आवश्यक आहे, याविषयी सखोल मार्गदर्शन केले. यावेळी दोन मुली असलेल्या मातांचे पुष्पगुच्छ देऊन स्वागत करण्यात आले, तसेच परसबागेतून पोषण आहाराबाबत

मार्गदर्शन करून अंगणवाडी स्तरावर पोषण अभियान प्रभावीपणे राबविले जात आहे. यादरम्यान महिलांनी सुंदर व प्रबोधनात्मक रांगोळी काढून जनजागृती केली, तसेच कडधान्य, भाजीपाला व पाककृतीबाबत पालकांचे व मातांचे समुपदेशन करण्यात आले. या कार्यक्रमाचे संचालन हर्षा भोजने यांनी केले, तर आभार छाया इंगोले यांनी मानले. या कार्यक्रमाच्या यशस्वीतेकरिता अंगणवाडी सेविका जोत्स्ना बोरकर, ढोबळे, मंजू चव्हाण, सुनीता देवळे, सिंधूताई तवर, भारती, अनिता विटकरे, भुजाडे, संगीता भगत, लता भगत, उंदरे, अवगन आदींचे सहकार्य लाभले.