बालकांची तपासणी, महिलांच्या लसीकरणावरही भर!

वाशिम : जिल्ह्यात १ सप्टेंबरपासून पोषण महोत्सवाचा शुभारंभ झाला असून, यादरम्यान कुपोषित बालकांची तपासणी, अंगणवाडी सेविकांचे १०० टक्के कोविड लसीकरण, गरोदर आणि स्तनदा महिलांसाठी कोविड लसीकरण यासह विविध उपक्रम राबविण्यात येत असल्याचे जिल्हा परिषदेच्या महिला व बालकल्याण विभागाचे उपमुख्य कार्यकारी अधिकारी संजय जोल्हे यांनी सांगितले.

राष्ट्रीय पोषण महिना दरवर्षी १ ते ३० सप्टेंबर या कालावधीत साजरा करण्यात येतो. यंदाही पोषण महोत्सवावर कोरोनाचे सावट आहे; परंतु कोरोनाविषयक नियमांचे पालन करून जिल्ह्यात अंगणवाडी केंद्राच्या माध्यमातून पोषण माह अभियान प्रभावीपणे राबविण्यात येत आहे. अंगणवाडी केंद्र, शाळा, ग्रामपंचायत, पंचायत समिती आदी ठिकाणी सार्वजनिक जागांवर वृक्षारोपण करून पोषण वाटिका तयार करणे, परसबाग तयार करणे याबाबत जनजागृती करण्यात येत आहे. गरोदर महिलांसाठी स्तनपानविषयक समुपदेशन, पोषण आहार व लोह याबाबत समुपदेशन, गर्भवती महिलांसाठी पोषण आहारबाबत घोषवाक्य तयार करण्यासाठी स्पर्धा घेणे, मातृत्व वंदन सप्ताह साजरा करणे तसेच अंगणवाडी सेविकांचे १०० टक्के कोविड लसीकरण, गरोदर आणि स्तनदा महिलांसाठी कोविड लसीकरण यावर भर देण्यात आला आहे. अंगणवाडी केंद्रातील बालके आणि किशोरवयीन मुली यांचे आरोग्य पोषण या अनुषंगाने ३० सप्टेंबरपर्यंत विविध उपक्रम राबविण्यात येणार आहेत. वाशिम, रिसोड, मालेगाव, कारंजा, मानोरा व मंगरूळपीर अशा सहा प्रकल्प स्तरांतर्गत येणाऱ्या अंगणवाडी केंद्राच्या माध्यमातून जिल्ह्यात पोषण महोत्सवांतर्गत व्यापक प्रमाणात जनजागृती केली जात असल्याचे संजय जोल्हे यांनी सांगितले.

००००००००००००

कुपोषित बालकांच्या आरोग्याला प्राधान्य

जिल्ह्यातील कुपोषित बालकांची संख्या कमी करण्याच्या दृष्टिकोनातून सॅम श्रेणीतील बालकांचा शोध घेणे आणि पोषण आहाराचे वाटप करणे, कुपोषित बालकांची आरोग्य तपासणी, नियमित औषधोपचार यावर भर देण्यात येत आहे. ३० सप्टेंबरपर्यंत जिल्ह्यात पोषण महोत्सव प्रभावीपणे राबविण्याच्या सूचना सर्व बालविकास प्रकल्प अधिकाऱ्यांना देण्यात आल्या, असे उपमुख्य कार्यकारी अधिकारी संजय जोल्हे यांनी सांगितले.