आणखी एकाचा मृत्यू; नऊ जण कोरोना पाॅझिटिव्ह

डिसेंबर व जानेवारी महिन्यात कोरोनाबाधितांच्या संख्येत चढ-उतार दिसून आला. फेब्रुवारी महिन्यातही रुग्णसंख्येत चढउतार दिसून येत आहे. कोरोनामुळे उपचारादरम्यान एकाचा मृत्यू झाल्याची नाेंद ११ फेब्रुवारी रोजी घेण्यात आली. आणखी नऊ जणांचा कोरोना चाचणी अहवाल पाॅझिटिव्ह आला. यामध्ये वाशिम शहरातील पाटणी चौक येथील १, पोदार ले-आउट परिसरातील २, आययुडीपी कॉलनी परिसरातील १, कळंबा महाली येथील १, मंगरुळपीर शहरातील संभाजीनगर येथील १, बायपास रोड परिसरातील १, मसोला खु. येथील १ व्यक्ती कोरोनाबाधित असल्याचे निदान झाले आहे. जिल्ह्याबाहेर एका कोरोना बाधिताची नोंद झाली आहे.

कोरोनाबाधितांच्या संपर्कातील संदिग्ध रुग्णांची तपासणी करण्यात येत आहे. जिल्ह्यात एकूण कोरोनाबाधितांचा आकडा आता ७,२६६ वर पोहोचला आहे. गुरुवारी १५ जणांना रुग्णालयातून सुट्टी झाली. दरम्यान, आणखी एका जणाचा उपचारादरम्यान मृत्यू झाल्याची नोंद गुरुवारी घेण्यात आली. आतापर्यंत कोरोनामुळे १५६ जणांचा मृत्यू झाला. दरम्यान, गत तीन दिवसांपासून रिसोड शहर व तालुक्यात कुणीही कोरोना पाॅझिटिव्ह आढळून आले नाहीत. कोरोनाचा धोका अजून टळलेला नाही. त्यामुळे जिल्ह्यातील नागरिकांनी आवश्यक ती खबरदारी घ्यावी, असे आवाहन जिल्हा प्रशासन व आरोग्य विभागाने केले.

००००

९९ जणांवर उपचार

जिल्ह्यात आतापर्यंत ७,२६६ कोरोनाबाधित रुग्ण आढळून आले. यापैकी ७,०१० जणांनी कोरोनावर मात केली. सध्या जिल्हा सामान्य रुग्णालय, तालुकास्तरीय कोविड केअर सेंटर आणि तीन खासगी कोविड हॉस्पिटल, गृहविलगीकरण येथे ९९ रुग्णांवर उपचार सुरू आहेत. उपचार सुरू असलेल्या रुग्णांची प्रकृती स्थिर असल्याचे आरोग्य विभागाने स्पष्ट केले.