बंद जि. प. शाळा बनल्या विषारी जिवांचे माहेरघर; प्रांगणास झुडपांचा विळखा

लोकमत न्यूज नेटवर्क

वाशिम : गेल्या दीड वर्षांपासून जिल्हा परिषदेच्या प्राथमिक शाळा बंदच आहेत. आता पावसाळ्याच्या दिवसांत याकडे दुर्लक्ष झाल्याने जवळपास ९० टक्क्यांहून अधिक शाळांत मोठमोठी झुडपे वाढल्याने या शाळा साप, विंचसारख्या विषारी जिवांचे माहेरघरच बनल्याचे चित्र दिसत आहे.

कोरोना संसर्गामुळे गतवर्षीच्या सत्रापासूनच सर्वच प्राथमिक आणि माध्यमिक शाळा बंद ठेवण्यात आल्या. सद्यस्थितीत आठवी ते बारावीपर्यंतच्या शाळा सुरू करण्यात आल्या असल्या तरी पहिली ते सातवीपर्यंतच्या शाळा बंदच आहेत. सद्यस्थितीत ऑनलाइन शिक्षणामुळे ५० टक्के शिक्षक या शाळांत उपस्थित राहून विद्यार्थ्यांना शिक्षणाचे ऑनलाइन पद्धतीने धडे देत आहेत. शाळेच्या साफसफाईकडे मात्र कोणीच लक्ष देत नाही. पावसाळ्याच्या दिवसांत शाळेच्या साफसफाईकडे दुर्लक्ष झाल्याने आता जि. प.च्या बंद असलेल्या ९० टक्क्यांहून अधिक शाळांत मोठमोठी झुडपे वाढली असून, या शाळा साप, विंचूसारख्या विषारी जिवांचे माहेरघरच बनल्याचे चित्र दिसत आहे.

---------------

जबाबदारीकडे मुख्याध्यापकांचे दुर्लक्ष

जि. प. शाळांतील सोयीसुविधा व साफसफाई राखण्याची मुख्य जबाबदारी शाळेचे मुख्याध्यापक व शिक्षकांकडेच असते. यासाठी जि. प. शिक्षण विभागाकडून शाळांना निधीही दिला जातो; परंतु शिक्षकांसह मुख्याध्यापकांचेही या जबाबदारीकडे दुर्लक्ष असल्याने आता शाळांना जुनाट, पडक्या, वापरात नसलेल्या इमारतींचे रूप आले आहे.

०००००००००००००००००००

शिक्षकांच्या उपस्थितीवरही प्रश्नचिन्ह सद्य:स्थितीत पहिली ते सातवीपर्यंतच्या शाळा बंद असून, या शाळांवर कार्यरत एकूण शिक्षकांपैकी ५० टक्के शिक्षकांनाच आळीपाळीने शाळेत येऊन विद्यार्थ्यांना ऑनलाइन पद्धतीने शिक्षणाचे धडे देण्याचे निर्देश आहेत; परंतु जि. प.च्या शाळा परिसराचे चित्र पाहता शाळेत शिक्षक येतात की नाही, यावरही प्रश्नचिन्ह लागले आहे.

०००००००००००००००००००००००

वर्गखोल्यांतही धूळ, कचरा

जि. प.च्या शाळा बंद असल्याने शाळेच्या साफसफाईकडे दुर्लक्ष होऊन परिसरात झुडपे वाढली आहेतच शिवाय वर्गखोल्यांतही मोठ्या प्रमाणात धूळ, कचरा साचल्याचे चित्र बहुतांश शाळांत पाहायला मिळत आहे. केवळ कार्यालय उघडूनच शिक्षक, मुख्याध्यापक ऑनलािन शिक्षणाचे सोपस्कार पाडत असल्याचे यावरून स्पष्ट होत आहे.

------------

कोट: जि. प.च्या शाळांची साफसफाई करण्याची जबाबदारी मुख्याध्यापकांची आहे. शाळा व्यवस्थापन समितीने याकडे लक्ष देऊन साफसफाई करून घ्यायला हवी. शाळांत वाढलेली झुडपे काढून शाळांची तातडीने साफसफाई करण्याचे निर्देश सर्वच मुख्याध्यापकांना दिले जातील.

-गजाननराव डाबेराव,

प्रभारी उपशिक्षणाधिकारी (प्राथमिक)

जि. प. वाशिम

-------

जिल्ह्यातील एकूण प्राथमिक जि. प. शाळा-७७५

जि. प. प्राथमिक शाळांवर कार्यरत शिक्षक-३१००

------------

तालुकानिहाय जि. प. प्राथमिक शाळा व शिक्षक

तालुका - शाळा - शिक्षक

कारंजा - १४७ - ५२४

मानोरा - १३२ - ४७३

मंगरूळपीर- ११९ - ४४०

वाशिम - १३७ - ६२१

रिसोड - १०८ - ४७८

मालेगाव - १३२ - ५६४