वाशिम : दरवर्षी १४ एप्रिल या दिवशी परमपूज्य भारतरत्न डॉ. बाबासाहेब आंबेडकर यांचे अनेक अनुयायी मोठ्या संख्येने जमून तसेच जयंतीदिनाच्या आदल्या दिवशी मध्यरात्री १२ वाजतादेखील एकत्र येऊन परमपूज्य भारतरत्न डॉ. बाबासाहेब आंबेडकर जयंती राज्यात ठिकठिकाणी साजरी करतात. परंतु या वर्षी कोविड-१९ चा वाढता प्रादुर्भाव टाळण्यासाठी अत्यंत साधेपणाने सकाळी ७ वाजल्यापासून रात्री ८ वाजण्यापूर्वी परमपूज्य भारतरत्न डॉ. बाबासाहेब आंबेडकर जयंती साजरी करावी, असे आवाहन जिल्हा आपत्ती व्यवस्थापन प्राधिकरणाचे अध्यक्ष तथा जिल्हाधिकारी षण्मुगराजन एस. यांनी केले आहे.
या वर्षी कोविड-१९ विषाणूचा वाढता प्रादुर्भाव विचारात घेता दरवर्षीप्रमाणे प्रभातफेरी, बाईक रॅली, मिरवणुका जयंतीनिमित्त काढण्यात येऊ नयेत. त्याऐवजी परमपूज्य भारतरत्न डॉ. बाबासाहेब आंबेडकर यांच्या पुतळ्याला अथवा प्रतिमेला पुष्पहार अर्पण करताना त्या ठिकाणी अनुयायांची संख्या एकावेळी पाचपेक्षा जास्त नसावी. तसेच सोशल डिस्टन्सिंगचे व स्वच्छतेच्या सर्व नियमांचे काटेकोरपणे (मास्क, सॅनिटायझर, इत्यादी) पालन करून परमपूज्य भारतरत्न डॉ. बाबासाहेब आंबेडकर जयंती साजरी करावी.
कोविड-१९ विषाणू संसर्गाच्या पार्श्वभूमीवर चैत्यभूमी, दादर, मुंबई येथे गर्दी करण्यास निर्बंध असल्याने व दादर, मुंबई तसेच महाराष्ट्रातील अन्य रेल्वेस्थानकांवरही गर्दी करण्यास निर्बंध असल्याने शासनातर्फे जयंतीनिमित्त चैत्यभूमी, दादर, मुंबई येथील कार्यक्रमाचे दूरदर्शनवरून थेट प्रक्षेपण करण्यात येणार असल्याने वाशिम जिल्ह्यातील सर्व अनुयायांनी चैत्यभूमी, दादर मुंबई येथे न जाता घरातूनच परमपूज्य डॉ. बाबासाहेब आंबेडकर यांना अभिवादन करावे.
दरवर्षी परमपूज्य भारतरत्न डॉ. बाबासाहेब आंबेडकर जयंती साजरी करताना संपूर्ण महाराष्ट्रात विविध कार्यक्रमांचे आयोजन केले जाते; परंतु यावर्षी कोविड-१९ विषाणूचा प्रादुर्भाव पाहता सार्वजनिक ठिकाणी गाणी, व्याख्याने, पथनाट्य, इत्यादींचे सादरीकरण अथवा इतर कोणत्याही सांस्कृतिक कार्यक्रमांचे आयोजन जयंतीनिमित्त करण्यात येऊ नये. त्याऐवजी कार्यक्रमाचे केबल नेटवर्कद्वारे अथवा ऑनलाईन प्रक्षेपण उपलब्ध करून देण्याबाबत व्यवस्था करण्यात यावी.
परमपूज्य भारतरत्न डॉ. बाबासाहेब आंबेडकर जयंतीदिनी आरोग्यविषयक उपक्रम, शिबिरे (उदा. रक्तदान) स्थानिक प्रशासनाच्या पूर्वानुमतीने आयोजित करता येतील आणि त्याद्वारे कोरोना, मलेरिया, डेंग्यू, इत्यादी आजार आणि त्यांचे प्रतिबंधात्मक उपाय तसेच स्वच्छता यांबाबत जनजागृती करता येईल. तथापि आरोग्यविषयक उपक्रमांचे आयोजन करताना त्या ठिकाणी सोशल डिस्टन्सिंग तसेव स्वच्छतेचे नियम (मास्क, सॅनिटायझर इत्यादी) पाळण्याचे विशेष लक्ष देण्यात यावे.
राज्यातील कोविड-१९ विषाणूचा वाढता प्रादुर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित नगरपालिका, पोलीस प्रशासन, स्थानिक प्रशासन यांनी विहित केलेल्या नियमांचे काटेकोर पालन करावे.