आशा वर्कर्स अवैध वसुली; चौकशीचा मुहूर्त निघाला

आशा वर्कर्सकडुन छापील रजिस्टर देताना आर्थिक देवाणघेवाण केल्याचा अहवाल वाशिमचे तालुका आरोग्य अधिकारी यांनी मुख्य कार्यकारी अधिकारी यांना सोपवला होता. त्या आधारावर जिल्हा समूह संघटक अनिल उंदरे आणि तालुका समूह संघटक राहुल धमेरिया यांना त्यांच्या पदावरून तात्पुरते कार्यमुक्त केले. या दोघांची कार्यमुक्ती तात्पुरती करावयाची किंवा कायमस्वरूपी करावयाची याशिवाय इतर तालुक्यातील तालुका संघटक व गट प्रवर्तक यामध्ये दोषी आढळतात काय याची चाचपणी करण्यासाठी मुख्य कार्यकारी अधिकारी यांनी त्रिसदस्यीय समिती नेमली आहे. या त्रिसदस्यीय समितीच्या चौकशीसाठी प्रत्येक तालुक्यातील आशा वर्कर्स यांना त्यांच्या तालुका स्तरावरील पंचायत समिती सभागृहात बोलविण्यात येणार आहे. यासाठी मालेगाव तालुक्यातील चौकशी १५ सप्टेंबरला, वाशिम तालुक्यातील चौकशी १७ सप्टेंबरला, रिसोड तालुक्यातील चौकशी २१ सप्टेंबरला, मंगरुळपीर तालुक्यातील चौकशी २४ सप्टेंबरला, मानोरा तालुक्यातील चौकशी २८ सप्टेंबरला तर कारंजा तालुक्यातील चौकशी १ ऑक्टोबरला करण्यात येणार आहे. या त्रिसदस्यीय समितीसमोर आशा वर्कर्सनी केलेली तक्रार ग्राह्य धरूनच दोषींवर कार्यवाही होणार आहे.

०००००००

आशा वर्कर्सवर दबाव आणण्याचा प्रयत्न

आशा स्वयंसेविकाकडुन विविध कारणे समोर करून पैसा वसुलीचा गोरखधंदा करणाऱ्यांनी आपली एक साखळी निर्माण करून आशा वर्कर्स यांना आपल्या बाजूने जबाब नोंदविण्यासाठी प्रयत्न सुरू केले आहेत. बºयाच ठिकाणी आशांकडुन घेतलेली रक्कम परत करण्याचीही धावपळ सुरू झाली आहे. परंतु आशा वर्कर्सनी या महाभागांना जर या प्रकरणात मदत केली तर त्यांचे पुढील भविष्य मात्र अंधकारात जाणार हे तितकेच सत्य.

००००

‘त्या’ बीसीएमच्या आशांना धमक्या

मानोरा तालुक्यातील बीसीएम (तालुका समूह संघटक) ने आशांच्या घरोघरी जाऊन त्यांना दिलेले रजिस्टर परत घेतले आहेत. याशिवाय सन २०१५ मध्येही या बीसीएमने प्रत्येकी ५०० रुपये घेऊन एक रजिस्टर दिले होते. सर्व आशांच्या भेटी घेऊन या बीसीएमने चौकशी समितीजवळ रजिस्टर व पैसे घेतले नाही असा खोटा जबाब नोंदविण्यासाठी दबाव टाकला आहे. याशिवाय पंतप्रधान मातृवंदना योजना अंतर्गत लाभार्थ्यांचे खात्यामध्ये अद्यापही पैसे आलेले नाहीत. यामध्ये भ्रष्टाचार झाल्याची तक्रार आशा स्वयंसेविकांनी लेखी स्वरूपात मुख्य कार्यकारी अधिकारी यांचेकडे केली आहे. या तक्रारीचीही चौकशी होणे महत्वाचे आहे.