कुणीही या आणि वाचनासाठी मोफत पुस्तके घेऊन जा!

वाशिम : सोशल मीडियावर अधिकाधिक वेळ घालविणाऱ्या युवकांना वाचनाकडे वळविण्यासाठी जउळका रेल्वे येथील सूरज अवचार या युवकाने ओपन अभ्यासिका / ग्रंथालय सुरू केले आहे. या ठिकाणी मोफत पुस्तके वाचायला मिळणार असून, नागरिक त्यांच्याकडील पुस्तकेदेखील ग्रंथालयाला देऊ शकणार आहेत.

मोबाइलच्या जमान्यात वाचनसंस्कृती लोप पावत असल्याचे दिसून येते. युवकांमध्ये मोबाइलवेड असल्याने ते पुस्तक वाचनाकडे वळत नाहीत. सूरज अवचार याने युवकांमध्ये वाचन संस्कृती रुजविण्याचा प्रयत्न चालविला आहे. जउळका या ग्रामीण भागात हे ओपन अभ्यासिका / ग्रंथालय सुरू करण्यात आले आहे. जास्तीत जास्त लोक, विद्यार्थ्यांनी वाचावे आणि वाचन परंपरा चालू राहावी यासाठी ही अभ्यासिका / ग्रंथालय सुरू करण्यात आल्याचे सूरज सांगतो. या ठिकाणी एक कपाट ठेवले असून, त्यात विविध विषयांवरील पुस्तके आहेत. विद्यार्थी कधीही मोफत पुस्तक घेऊन जाऊ शकतात, तसेच वाचून पुन्हा या ठिकाणी ते परत आणू शकतात, तसेच ज्यांच्याकडे विविध विषयांवरील पुस्तके आहेत, ते या अभ्यासिकेला पुस्तके भेटसुद्धा देऊ शकतात. ६ जून रोजी सुरू झालेल्या या अभ्यासिकेत ७० ते ८० पुस्तके ठेवण्यात आली होती. त्यातील ५० पुस्तके विद्यार्थी वाचण्यासाठी घेऊन गेले आहेत.

००००००

मोबाइल क्रमांकावर अभिप्राय

या ठिकाणी सूरजने एक मोबाइल क्रमांक दिला आहे. विद्यार्थ्यांनी घेतलेल्या पुस्तकाचे नाव त्या नंबरवर पाठवायचे आहे, तसेच पुस्तक वाचल्यानंतर अभिप्रायसुद्धा या क्रमांकावर कळविता येणार आहे.

००००

तरुणांना नवीन विचार मिळेल

या उपक्रमाबद्दल सूरज अवचार म्हणातो, सध्या वाचन संस्कृती लोप पावत चाललेली आहे. ती पुन्हा एकदा सुरू व्हावी यासाठी ही अभ्यासिका / ग्रंथालय सुरू करण्याचा निर्णय घेतला. यातून तरुणांना नक्कीच नवीन विचार मिळेल, असे सूरज अभिमानाने सांगतो.