२५ हजार नागरिकांचे आरोग्य वार्‍यावर

शहीदांच्या भूमीतील प्राथमिक आरोग्य केंद्राची अवस्था दयनीय व बिकट होत आहे. गत वर्षभरापासून वैद्यकीय अधिकार्‍यांची दोन पदे रिक्त आहेत. त्यामुळे एकाच अधिकार्‍याच्या

आष्टी (शहीद) : शहीदांच्या भूमीतील प्राथमिक आरोग्य केंद्राची अवस्था दयनीय व बिकट होत आहे. गत वर्षभरापासून वैद्यकीय अधिकार्‍यांची दोन पदे रिक्त आहेत. त्यामुळे एकाच अधिकार्‍याच्या खांद्यावर आरोग्याची धूरा आहे. उन्हाळ्याच्या दिवसात साथीचे आजार, कार्यालयीन कामकाज व वर्धा येथील सभा ही कामे करणे अवघड झाले आहे. येथे तालुका आरोग्य अधिकारी तथा वैद्यकीय अधिकारी पदाचा कार्यभार डॉ. एस. आर. रंगारी सांभाळत आहेत. दोन वैद्यकीय अधिकारी पद रिक्त आहे. शासन बीएएमएस वैद्यकीय अधिकार्‍यांना नियमीत सेवेत सामावून घेत नाहीत. त्यामुळे मानधन तत्त्वावर काम करण्यास अधिकारी तयार नाहीत. एमबीबीएस झालेले अधिकारी मिळत नाही. त्यामुळे अतिरिक्त प्रभावी अधिकार्‍यांच्या खांद्यावर धूरा देवून दिवसाची कसरत करावी लागत आहे. प्राथमिक आरोग्य केंद्राच्या जागेवर ग्रामीण रुग्णालयाचे बांधकाम सुरू आहे. त्यामुळे पर्यायी व्यवस्था म्हणून ग्रामीण रुग्णालयाच्या इमारतीत प्राथमिक आरोग्य केंद्र सुरू आहे. ग्रामीण रुग्णालयाच्या पहिला माळा बांधकाम पूर्ण झाले. दुसर्‍या माळ्याचे काम सुरू आहे. शासनाने तत्काळ ग्रामीण रुग्णालयात कर्मचार्‍यांची नियुक्ती करण्याची मागणी नागरिकांनी केली आहे. (प्रतिनिधी)