उत्तर प्रदेशमधील योगी आदित्यनाथ यांच्या नेतृत्वाखालील सरकारमधील मंत्री नंद गोपाल नंदी यांचा मुलगा अभिषेक गुप्ता आणि सून कनिष्का यांच्या कारला आज कन्नौज येथे भीषण अपघात झाला. अपघातग्रस्त झालेली कार नंद गोपाल नंदी यांचा मुलगा चालवत होता. ही कार अनियंत्रित होऊन डिव्हायडरवर आदळली आणि उलटली. या अपघातात कारच्या समोरील भागाचा चक्काचूर झाला. या अपघातात नंद गोपाल नंदी यांचा मुलगा आणि सून जखमी झाले. त्यांची प्रकृती स्थिर असल्याची माहिती समोर येत आहे.
नंदी यांचा मुलगा अभिषेक याचा विवाह ११ जुलै रोजी झाला होता. तसेच वधू-वरांना आशीर्वाद देण्यासाठी मुख्यमंत्री योगी आदित्यनाथ हेही उपस्थित होते. अपघातानंतर आसपासच्या लोकांनी घटनास्थळी धाव घेतली. त्यांनी दोघांनाही कारमधून बाहेर काढले. मात्र या दोघांनाही फार दुखापत झाली नाही. घटनास्थळावरील एक फोटोही समोर आला आहे. दरम्यान, आजूबाजूच्या लोकांकडून माहिती मिळाल्यानंतर पोलीस घटनास्थळी पोहोचले. तसेच त्यांनी दोघांनाही उपचारांसाठी लखनौ येथील पीजीआय येथे दाखल केले.
दरम्यान, प्रत्यक्षदर्शींनी सांगितले की, पाऊस पडल्याने रस्ता निसरडा झालेला होता. मात्र हा अपघात कुठल्या कारणामुळे झाला हे सांगू शकत नाही. जखमींना रुग्णवाहिकेमधून लखनौ येथे पाठवण्यात आलं आहे. नंद गोपाल नंदी हे उत्तर प्रदेशमधील योगी आदित्यनाथ यांच्या नेतृत्वाखालील सरकारमध्ये औद्योगिक विकासमंत्री आहेत. नंद गोपाल नंदी यांच्यावरही एकदा जीवघेणा हल्ला झाला होता, त्या प्रकरणाची सुनावणी सुरू आहे.