मुंबई-नागपूर शिवनेरी सेवेच्या प्रवास भाड्यात कपात

मुंबई-नागपूर शिवनेरी सेवेच्या प्रवास भाड्यात कपात
१४ डिसेंबरपासून १,८00 रुपये प्रवास भाडे
मुंबई - विधिमंडळ हिवाळी अधिवेशनादरम्यान एसटी महामंडळाकडून मुंबई ते नागपूर अशी सेवा सुरू करण्यात आली. मात्र अव्वाच्या सव्वा भाडे असलेल्या या सेवेकडे प्रवाशांनी पाठच फिरवली होती. त्यामुळे प्रवास भाडे कमी करण्याची मागणी केली जात होती. ही मागणी लक्षात घेत एसटी महामंडळाने भाड्यात ५७0 रुपयांची कपात केली आहे. त्यामुळे आता यापुढे १,८00 रुपये भाडे आकारणी केली जाणार आहे.
मुंबई-नागपूर मार्गावर ६ डिसेंबर ते ५ जानेवारीपर्यंत शिवनेरी एसी सेवा एसटी महामंडळाकडून सुरू करण्यात आली. ही सेवा सुरू करतानाच प्रत्येक प्रवाशामागे तब्बल २ हजार ३७0 रुपये प्रवास भाडे आकारण्यात आले. याच मार्गावर धावणार्‍या खासगी बसचे भाडे १,२00 ते १,४00 रुपये आकारण्यात येत असल्याने एसटीच्या बसला कमी प्रतिसाद मिळत होता. हे भाडे कमी करा, अशी मागणी प्रवाशांकडून केली जात होती. महामंडळाच्या फेसबुकवरूनही प्रवाशांनी ही मागणी जोर लावून धरली. त्यामुळे भाडे कमी करण्याचा विचार केला जाईल, असे एसटी महामंडळाचे उपाध्यक्ष आणि व्यवस्थापकीय संचालक संजय खंदारे यांनी सांगितले होते. त्यानुसार मुंबई-नागपूर या सेवेच्या प्रवास भाड्यात ५७0 रुपयांची कपात करण्याचा निर्णय घेतला आहे. १४ डिसेंबरपासून या सेवेचे भाडे १,८00 रुपये आकारण्यात येईल, असे एसटी महामंडळाकडून सांगण्यात आले.