अखेर उबेरचालकाच्या मृतदेहाचा लागला थांगपत्ता !

कल्याण : कारचोरीच्या उद्देशाने उबेरचालकाची हत्या करून त्याचा मृतदेह पुरावा नष्ट करण्यासाठी कसारा घाटात फेकल्याची घटना ९ ऑगस्टला उघडकीस आली होती. परंतु, चालकाचा मृतदेह सापडला नव्हता. दरम्यान, याप्रकरणातील सहा पैकी तीन आरोपींना बेड्या ठोकताना मृतदेहाचा थांगपत्ता लावण्यात कल्याणच्या महात्मा फुले चौक पोलिसांना यश आले आहे. तर, उर्वरित तीन आरोपींचा शोध सुरू असून, अटक आरोपींना सोमवारपर्यंत पोलीस कोठडी सुनावली आहे.

उबेरचालकाची हत्या झाल्याचे उघडकीस आल्यावर राहुलकुमार गौतम, धर्मेंद्रकुमार उर्फ वकील संपतराम गौतम, हरीश्चंद्र उर्फ अमन रमाकांत गौतम, करणकुमार विनोद गौतम, अमन हरीश्चंद्र गौतम, बचईकुमार गौतम (सर्व रा. उत्तर प्रदेश) आदी सहा जणांविरोधात गुन्हा दाखल झाला होता. कारचोरीचा बेत सहा आरोपींपैकी राहुलकुमारने आखला होता. ते सर्व उत्तर प्रदेशहून एक्स्प्रेसने कल्याण रेल्वे स्थानकात उतरले. त्यानंतर उबेर कंपनीकडे कल्याण ते धुळे, अशा प्रवासासाठी कार बुक करण्यात आली. कारचा चालक अमृत गावडे (रा. नवी मुंबई) हा कार घेऊन कल्याणच्या शिवाजी चौकात रात्री ११.३० च्या सुमारास आल्यावर पाच जण या कारमध्ये बसले. कारने आग्रा रोडने प्रवास करत असताना त्यांनी कारचालकाचे अपहरण करीत त्याला ठार मारून त्याचा मृतदेह कसारा घाटात फेकून दिला. त्यानंतर कारसह ते उत्तर प्रदेशला पसार झाले होते. यातील राहुलकुमार, धर्मेंद्रकुमार आणि गॅरेजचालक अमन अशा तिघांना अटक केली आहे.

-------------

फास्ट टॅगमुळे आरोपींचा लागला माग

कसारा येथून कार उत्तर प्रदेशला पळवून नेत असताना कारवर लावलेल्या फास्ट टॅगमुळे रस्त्यातील टोल नाक्यांवर उबेर कंपनीच्या खात्यातील पैसे कट होत होते. याची माहिती उबेर कंपनीकडून पोलिसांना देण्यात आली. त्यानुसार त्या मार्गावरून टोलनाके तपासले असता सीसीटीव्ही कॅमेऱ्यामध्ये ही कार दिसून आली होती. अखेर माग काढीत आरोपींपर्यंत पोहोचण्यात पोलिसांना यश आले आणि तीन आरोपी पकडले गेले.

------------------------------------------------------------------