भिवंडी -भिवंडी पोलीस परिमंडळ क्षेत्रात चैन स्नाचिंग करणाऱ्या चोरट्यांचा सुळसुळाट वाढला असून गुरुवारी एकाच दिवशी दोन पोलीस ठाणे हद्दीत रिक्षातून जाणाऱ्या महिलांच्या गळ्यातील मंगळसूत्र चोरीच्या दोन घटना घडल्या आहेत.
पहिल्या घटनेत शेलार येथील आरती निलेश भोईर या महिला आपल्या जाऊ श्वेता भोईर व भाग्यश्री भोईर, अशा तिघी जणी रिक्षाने खांडपे या गावी जाण्यासाठी पाऊणे अकरा वाजता निघाल्या असता ममता हॉस्पीटल जवळील स्पीड ब्रेकरचे सार्वजनिक रोडवर, मिल्लतनगर या ठिकाणी रिक्षा हळू झाली असता त्यांच्या पाळतीवर असलेल्या दुचाकीवरील दोघा जणांपैकी मागे बसलेल्या चोरट्याने आरती भोईर यांच्या गळ्यातील ६० हजार रुपये किमतीचे तीन तोळे वजनाचे सोन्याचे गंठण खेचून पसार झाले. या प्रकरणी निजामपुरा पोलीस ठाण्यात तक्रार दाखल करण्यात आली आहे .
तर दुसऱ्या घटनेत कल्याण खडकपाडा येथे राहणाऱ्या रोहिणी विजय राणे या महिओ रिक्षाने दुपारी अडीच वाजता भिवंडी कल्याण रोड मार्गे येत असताना राजनोली येथील प्रवीण लॉज समोर आली असता रिक्षा चालकाने पाणी बाटली विकत घेण्यासाठी रिक्षा थांबिवली.त्याच सुमारास त्यांचे रिक्षाचे डावे बाजुने दोन अनोळखी इसम काळया रंगाची प्लसर मोटार सायकल वरून येवुन दुचाकी वर पाठीमागे बसलेल्या इसमाने फिर्यादी यांचे गळयातील सोन्याचे मंगळसूत्र जबरीने खेचत असताना महिलेने मंगळसूत्र पकडून ठेवले असता त्या मंगळसुत्रापैकी ५० हजार रुपये किमतीचे दोन तोळे वजनाचे आर्धवट मंगळसूत्र जबरीने खेचुन घेवुन कल्याणच्या दिशेने पळून गेला या प्रकरणी कोनगाव पोलीस ठाण्यात गुन्हा दाखल करण्यात आला आहे.