ठाणे : घोडबंदर रोडने भरधाव वेगाने निघालेला ट्रेलर शुक्रवारी पहाटे पावणेपाच वाजण्याच्या सुमारास रस्त्यालगत लावलेल्या मेट्रोच्या बॅरिकेट्सला धडकून पुढे जाऊन रस्त्यावर उलटला. यात जखमी झालेल्या ट्रेलर चालकाने तेथून पळ काढल्याची घटना शुक्रवारी पहाटेच्या सुमारास घडली. मात्र, या घटनेमुळे कोणत्याही प्रकारे वाहतूककोंडी झाली नसल्याची माहिती ठामपा आपत्ती व्यवस्थापन कक्षाने दिली.
जखमी अवस्थेत पळून गेलेला चालक जवळच्या रुग्णालयात उपचारार्थ दाखल झाला असावा, असा अंदाज आहे. घटनेची माहिती कळताच कासारवडवली पोलीस, वाहतूक पोलीस यांनी घटनास्थळी धाव घेतली. त्यानंतर क्रेनच्या मदतीने वाहतूक कोंडी होण्यापूर्वीच रस्त्यावर उलटलेला ट्रेलर बाजूला केला. तसेच हा ट्रेलर रोहित कुमार यांच्या मालकीचा असून त्यातील कंटेनरमध्ये नेमके काय आहे हे समजू शकले नाही, अशी माहिती कक्षाच्या अधिकाऱ्याने दिली.