ठाणे - कुठल्याही मुलाला आपल्या आईच्या कुशीत सर्वात जास्त सुरक्षित वाटत आणि आई सुद्धा आपल्या मुलाच्या सुरक्षिततेसाठी वाट्टेल ते संकट झेलायला तयार असते. पण ठाणे जिल्ह्यात भिवंडीमध्ये बिलकुल या उलट घटना घडली आहे. आईनेच प्रियकराच्या साथीने पोटच्या मुलाची गळा आवळून हत्या केली. पोलिसांनी या प्रकरणी ममता यादव तिचा प्रियकर राकेश पटेल (30) आणि अमित कुमार (19) या तिघांना अटक केली आहे. अमित कुमार राकेशचा मित्र आहे. अमितने दोघांना मुलाचा मृतदेह पुरण्यासाठी मदत केली म्हणून पोलिसांनी त्याला अटक केली.
पोलिसांनी दिलेल्या माहितीनुसार ममताचा मार्च 2016 मध्ये विरेंद्र कुमारबरोबर (28) विवाह झाला होता. या जोडप्याला एक मुलगा होता. भिवंडीच्या दापोडा गावामध्ये यादव कुटुंब आनंदात राहत होते. विरेंद्र गोदामामध्ये नोकरी करतो. या कुटुंबाच सर्वकाही सुरळीत सुरु असताना ममताची त्या परिसरात राहणा-या राकेशबरोबर ओळख झाली. ओळखीचे रुपांतर प्रेमात झाले. मागच्यावर्षी नोव्हेंबर महिन्यात ममता आणि राकेश दोघे उत्तर प्रदेशला त्याच्या गावी पळून गेले होते. अलीकडेच ते भिवंडीला परतले होते. ममता राकेश आणि तिचा एक वर्षांचा मुलगा आर्यन एकत्र राहत होते. त्या दोघांना आर्यन पासून सुटका करुन घ्यायची होती.
त्यांच्या नात्यामध्ये आर्यन त्यांना अडथळा ठरत होता. त्यामुळे मंगळवारी रात्री ममता आणि राकेशने मिळून आर्यनची गळा आवळून हत्या केली. त्यानंतर भिवंडीच्या मानकोली इंडस्ट्रीयल इस्टेट परिसरात अमितच्या मदतीने त्यांनी आर्यनचा मृतदेह पुरला. विरेंद्रला जेव्हा ममतासोबत मुलगा दिसला नाही तेव्हा त्याने चौकशी केली. पण ममताकडून समाधानकारक उत्तर मिळाले नाही त्यामुळे त्याचा संशय वाढला. ममता उडवाउडवीची उत्तरे देत होती. अखेर विरेंद्रने नारपोली पोलीस स्टेशन गाठले. पोलिसांच्या चौकशीत ममताने पोटच्या मुलाची हत्या केल्याची कबुली दिली.