मीरारोड - संततधार पाऊस व वाऱ्या मुळे मीरा भाईंदर मध्ये ५ ठिकाणी झाडं पडली . यात एका रिक्षावर झाड पडून नुकसान झाले . तर शहरातील अनेक भागात पाणी साचले असून सायंकाळ पर्यंत पाणी कमी झाले नव्हते . अनेक भागात सांडपाणी घरां मध्ये शिरले . ठिकठिकाणी पाणी साचल्याने वाहतूक व्यवस्था व जनजीवन विस्कळीत झाले . काटेकोरपणे न झालेली नालेसफाई, प्लॅस्टिक व थर्माकोलने जाम झालेली गटारे व मोठ्या प्रमाणात झालेले भराव पूरस्थितीला कारणीभूत असल्याचे सांगितले जात आहे .
आज दिवसभरात ५ ठिकाणी झाडं पडल्याच्या घटना घडल्या . भाईंदर पश्चिमेला आंबेडकर नगर - स्मशानभूमी मार्गावर मोठे झाड पडून झाली उभ्या असलेल्या रिक्षाचे नुकसान झाले . तर नया नगर लोढा मार्ग , घोडबंदर स्मशानभूमी जवळ , मीरारोडचे चंद्रेश हाईट्स व उत्तन - डोंगरी मार्गावर झाडं पडली . पालिकेच्या उद्यान विभाग व अग्निशमन दलाने सदर झाडं बाजूला करून रस्ते मोकळे केले .
तर रात्रभर मुसळधार कोसळणाऱ्या पावसाचा जोर आज सोमवारी देखील कायम होता . त्यामुळे मीरारोडच्या कृष्ण स्थळ , गौरव संकल्प फेस 2, शांतिपार्कचे हॅपी होम कॉम्प्लेक्स, जांगीड कॉम्प्लेक्स , नित्यानंद नगरचे हायनेस पार्क, मुंशी कंपाउंड , माशाचा पाडा मार्ग - मीनाक्षी नगर , आरएनए ब्रॉडवे एव्हेन्यू , जय विजय नगर , सिल्वर पार्क , शीतल नगर , शांती नगर, सिल्वर सरिता, सुंदर सरोवर आदी भागात पाणी साचले होते .
तर भाईंदरचा टेम्बा मार्ग , नवघर, -न्यू आराधना इमारत परिसर , फाटक येथील मनपा पाण्याची टाकी परिसर , राई - शिवनेरी , बाळासाहेब ठाकरे मैदान परिसर , फुले मार्ग , बाळाराम पाटील मार्ग येथे पाणी साचल्याच्या तक्रारी होत्या .
महापालिकेने पाणी साचण्याच्या भागां मध्ये पाणी निचरा करण्यासाठी मोटर पंप लावल्याचे सांगितले आहे . परंतु अनेक ठिकाणी हे पंप कुचकामी ठरले आहेत . कृष्ण स्थळ , गौरव संकल्प फेस 2, सुंदर सरोवर आदी अनेक भागात सांडपाणी तुंबले व लोकांच्या घरात आणि दुकानात शिरले . अनेक भागात कमरे एवढे पाणी होते . उभी वाहनं देखील पाण्याखाली गेली . पालिकेचे स्वच्छता निरीक्षक व सफाई कामगार पाण्याचा निचरा होण्यासाठी गटारांचे मार्ग मोकळे करत होते . प्लॅस्टिक , थर्माकोल आदीने गटारांची तोंड जाम झाली होती . तर काही ठिकाणी गटारं साफ झाली नसल्याचे समोर आले . वसई च्या हद्दीत मुंबई अहमदाबाद महामार्गावर पाणी साचल्याने वाहनांची रांग थेट वारसावे व काशिमीरा पर्यन्त आली होती .