अंबरनाथ: अंबरनाथच्या शिवाजीनगर पोलिस ठाण्यात कार्यरत असलेल्या पोलिस कर्मचाऱ्यांचा एका विचित्र अपघातात दुर्दैवी मृत्यू झाला आहे. दुपारी पाच वाजताच्या सुमारास ही घटना घडली आहे.
अंबरनाथ शिवाजीनगर पोलीस ठाण्यात कार्यरत असलेले पोलिस कर्मचारी चंद्रकांत भागवत हे बदलापूरहुन अंबरनाथच्या दिशेने येत असताना अंबरनाथ एमआयडिसी रोडवरील वैभव हॉटेल चौकात एका भरधाव ट्रकने त्यांना जोरदार धडक दिली. ट्रक चालकाचा ट्रक वरील ताबा सुटल्याने हा ट्रक थेट रस्त्यावरील दुभाजकाला धडक देत थेट भागवत यांच्या दुचाकीवर आली. भागवत यांच्या दुचाकीबरोबरच या ट्रकने एक चार चाकी गाडीलाही धडक दिली. या अपघातात भागवत यांचा जागीच मृत्यू झाला तर चारचाकी गाडी मधील चालकाला किरकोळ दुखापत झाली. भागवत हे मूळचे अंबरनाथच्या मोरवली गावचे रहिवासी असून ते सध्या बदलापुरात कात्रप परिसरात राहत होते. याच रस्त्याने त्यांचा नियमित प्रवास देखील सुरू होता.मात्र आजच्या अपघातामुळे त्यांना आपला जीव गमवावे लागले आहे.