उल्हासनगरात दाेन मंगल कार्यालयांना दंड

उल्हासनगर : कोरोनाचा प्रादुर्भाव रोखण्यासाठी महापालिकेने लागू केलेल्या निर्बंधांचे उल्लंघन करणाऱ्या दोन मंगल कार्यालयांवर सहायक आयुक्त गणेश शिंपी यांनी ४० हजारांचा दंड वसूल केला. या कारवाईने मंगल कार्यालये, चित्रपटगृह, मॉल, दुकानदार आणि व्यापाऱ्यांमध्ये वचक निर्माण झाला आहे. या निर्बंधांचे काटेकाेर पालन करण्याचे आवाहन गणेश शिंपी यांनी नागरिकांना केले आहे.

उल्हासनगरात काही दिवसांपासून कोरोना रुग्णांच्या संख्येत वाढ झाली आहे. आयुक्त डॉ. राजा दयानिधी यांनी काही निर्बंध लागू केले आहेत. यामध्ये लग्नसभारंभाला ५० जणांना, तर अंत्यसंस्काराला २० जणांना उपस्थित राहण्यास परवानगी देण्यात आली आहे. मात्र, अनेक जण या निर्बंधांचे पालन करत नसल्याचे उघड झाले. कॅम्प नं. ३ परिसरातील मोनिका व हिरा मॅरेजचे व्यवस्थापक व लग्नसमारंभाला आलेल्या नवरा-नवरीकडील मंडळींसह लग्नात सहभागी झालेल्या नागरिकांना कोरोनाचा विसर पडल्याचे उघड झाले. सहायक आयुक्त गणेश शिंपी यांच्या पथकाने रविवारी दोन्ही मंगल कार्यालयांना भेट दिली. कोरोनाचे निर्बंध पायदळी तुडवले जात असल्याचे दिसताच त्यांनी दंड ठाेठावला. कोरोना निर्बंधांचे अनेकजण पालन करत आहेत. मात्र काही जण त्याला गालबोट लावत असल्याची प्रतिक्रिया व्यापारी संघटनेचे दीपक छतलानी यांनी दिली.

कारवाई सुरूच ठेवणार : शिंपी

सहायक आयुक्त गणेश शिंपी यांनी कोरोना निर्बंधांचे उल्लंघन करणाऱ्या विरोधात नियमानुसार कारवाई सुरूच ठेवणार असल्याचे सांगितले. महापौर लीलाबाई अशान, उपमहापौर भगवान भालेराव यांनीही नागरिकांसह व्यापाऱ्यांनी कोरोनाचे निर्बंध पाळण्याचे आवाहन केले.