Mumbai Train Accident: सोमवारी सकाळी मुंब्रारेल्वे स्थानकाशेजारी जी दृश्य समोर आली, ती पाहून सगळेच हळहळले. वेगात असलेल्या दोन लोकल ट्रेन जवळून जात असताना दारात लटकलेल्या लोकांचा धक्का लागला आणि भयावह घटना घडली. दारात लटकून प्रवास करणारी माणसं किड्या मुंग्यासारखी खाली पडली. काहींना प्राण गमावावे लागले, तर काही गंभीर जखमी झाले. या घटनेत मृत्यू झालेल्यांची नावे आता समोर आली आहेत.
'लोकमत'चं WhatsApp चॅनल फॉलो करा!
मुंब्राजवळरेल्वेतून प्रवासी पडल्याची घटना सोमवारी सकाळी घडली. या घटनेबद्दल प्रशासनाकडून माहिती देण्यात आली. जखमींना तातडीने ठाणे महानगरपालिकेच्या कळव्यातील छत्रपती शिवाजी महाराज रुग्णालयात भरती करण्यात आले. तर मयत प्रवाशांचे मृतदेह ठाणे जिल्हा रुग्णालयात नेण्यात आले.
मुंब्रा अपघात: मृत्यू झालेल्यांची नावे
१) राहुल संतोष गुप्ता (वय २८, रा. दिवा)
२) केतन दिलीप सरोज (वय २३, रा. तानाजी नगर, उल्हासनगर)
३) मयूर शाह (वय ५० )
४) विकी बाबासाहेब मुख्यदल (वय ३४, रेल्वे पोलीस कर्मचारी)
दोघांची प्रकृती गंभीर
छत्रपती शिवाजी महाराज रुग्णालयाचे अधिष्ठाता डॉ. राकेश बारोट यांनी दिलेल्या माहितीनुसार, जखमींपैकी दोघांची प्रकृती गंभीर आहे. मेंदूशी निगडित तातडीची शस्त्रक्रिया आवश्यक असल्याने तत्काळ जुपिटर हॉस्पिटल येथे हलवण्यात आले.
वाचा >>"घटना दुर्दैवी, 'रेल्वे'कडून अपघाताची चौकशी सुरू"; मुख्यमंत्र्यांनी दिली महत्त्वाची माहिती
तर सात जणांची प्रकृती स्थिर असून, यात ५ पुरुष आणि दोन महिलांचा समावेश आहे. सर्व सातही रुग्ण स्थिर असून अतिदक्षता कक्षात दाखल करण्यात आले आहे.