ठाणे, दि. 22 - मोस्ट वॉण्टेड अंडरवर्ल्ड डॉन दाऊद इब्राहिम पाकिस्तानातच आहे अशी माहिती अटकेत असलेल्या दाऊदचा भाऊ इकबाल कासकरने पोलिसांना दिली आहे. यासोबतच त्याने दाऊद राहत असलेल्या पाच ते सहा ठिकाणांचे पत्तेही पोलिसांना दिले आहेत. दाऊद इब्राहिमचा धाकटा भाऊ इकबाल कासकरला ठाणे गुन्हे शाखेने अटक केली आहे. एका खंडणी प्रकरणामध्ये इकबाल कासकरला अटक करण्यात आली.
पाकिस्तान मात्र वारंवार दाऊद पाकिस्तानात नसल्याचा दावा करत आला आहे. भारताने याआधी दाऊदच्या कराची आणि इतर शहरांमधील पत्त्यांची माहिती देत दाऊद पाकिस्तानात असल्याचा दावा केला होता. इकबाल कासकरच्या माहितीमुळे भारताचा दावा खरा ठरला आहे.
बांधकाम व्यावसायिकाकडे खंडणी मागितल्याप्रकरणी दाऊद इब्राहिम याचा भाऊ इकबाल कासकर आणि त्याच्या तीन साथिदारांना 8 दिवसांची पोलीस कोठडी सुनावण्यात आली आहे. इकबाल कासकरला तीन साथीदारांसह ठाणे खंडणीविरोधी पथकाने भायखळा येथून अटक केली होती. त्यानंतर त्याला ठाणे न्यायालयात हजर करण्यात आले असता न्यायालयाने त्याला 8 दिवसांची पोलीस कोठडी सुनावली.
दरम्यान इकबाल कासकरने पोलिसांना दिलेल्या माहितीनुसार, 'फोन टॅप होत असल्याच्या भीतीने दाऊद गेल्या तीन वर्षांपासून माझ्याशी आणि इतर नातेवाईकांशी बोलणं टाळत आहे'. मात्र आपण आपला दुसरा भाऊ अनीस अहमदच्या संपर्कात असल्याचा दावा त्याने केला आहे. आपल्या आंतरराष्ट्रीय फोन क्रमांकावरुन अनीस ईद आणि इतर सणांना फोन करतो असं इकबाल कासकरने सांगितलं आहे. 'इकबाल कासकर तपासात सहकार्य करत नसून बोलण्यास नकार देत आहेत. मात्र त्याने आपण 1993 स्फोटातील आरोपी आपला मोठा भाऊ अनीस अहमदच्या संपर्कात असल्याचं मान्य केलं आहे', अशी माहिती पोलिसांनी दिली आहे.
अनेक प्रश्नांना इकबाल कासकर नकारात्मक उत्तरे देऊन पोलिसांची दिशाभूल करत असल्याची माहिती सूत्रांनी दिली. दाऊद आणि इकबाल यांच्यात फोनद्वारे वारंवार संवाद झाल्याचा पोलिसांना संशय आहे. परंतु, व्हीओआयपी (व्हाइस ओव्हर इंटरनेट प्रोटोकॉल) द्वारे हा संपर्क झाल्याची शक्यता असल्यामुळे बाहेरील कॉलही स्थानिक असल्याचे आढळून येते. त्यामुळे पुरावे मिळवताना पोलिसांना अनेक अडचणींना तोंड द्यावे लागत आहे. या टोळीमध्ये मुंबई, ठाण्यातील अनेक जण सहभागी असल्याची माहिती पोलीस तपासात उघड होत आहे. इकबाल हा कोकेनपासून अनेक अमली पदार्थांच्या आहारी गेलेला आहे. याच कारणामुळे दाऊदची आपल्यावर नाराजी आहे. याच नाराजीमुळे दोघांमध्ये गेल्या काही महिन्यांमध्ये फोनवर किंवा प्रत्यक्ष बोलणे झाले नसल्याचा दावा त्याने पोलिसांकडे केला. आता त्यात कितपत तथ्य आहे, याचीही चाचपणी करण्यात येत आहे.
दरम्यान, ठाण्यातील काही नगरसेवक आणि नेत्यांचाही सहभाग समोर येत असल्याचा गौप्यस्फोट पोलीस आयुक्तांनी केल्याने ठाण्यातील राजकीय वातावरण तापलेले असतानाच, राष्ट्रवादीचे आमदार जितेंद्र आव्हाड यांनीही ठाण्याचे पोलीस आयुक्त परमवीर सिंग यांची भेट घेतली. मात्र, त्यांचे नाव अद्याप समोर आले नसल्याचे आयुक्तांनी त्यांना सांगितले.
लवकरच चौघांना अटकदाऊद टोळीतील काही गुंडांची माहिती इकबालकडून तपास पथकाला मिळाली आहे. त्यामुळे मुंबई परिसरातून आणखी तीन ते चार जणांना लवकरच ताब्यात घेण्यात येईल, असेही अभिषेक त्रिमुखे यांनी सांगितले. इकबालसोबत ताब्यात घेतलेल्या तिघांपैकी एकाचा खंडणी प्रकरणात बºयापैकी सहभाग आढळला आहे. त्याचीही अद्याप चौकशी सुरूच आहे. अन्य दोघांना गुन्हे अन्वेषण विभागाकडे चौकशीसाठी दररोज हजर राहण्यास बजावण्यात आले आहे.