दसरा सण मोठा; यंदा आनंदाला तोटा...!

साडेतीन मुहूर्तांपैकी एक असलेल्या दसऱ्याच्या खरेदीवर यंदा मंदीचे मळभ दाटून आल्याचे दिसून आले. सोन्याची खरेदी अवघी ३० टक्क्यांवर आली,

ठाणे : साडेतीन मुहूर्तांपैकी एक असलेल्या दसऱ्याच्या खरेदीवर यंदा मंदीचे मळभ दाटून आल्याचे दिसून आले. सोन्याची खरेदी अवघी ३० टक्क्यांवर आली, तर घरांची अवघी २० टक्के नोंदणी झाली. वाहनांच्या बुकींगवरही निरूत्साहाचा परिणाम दिसून आवा. त्यांची खरेदी अवघी ६० टक्के झाल्याचे विक्रेत्यांनी सांगितले.
सोन्याच्या, खास करून दागिन्यांच्या खरेदीकडील कल गेले काही दिवस कमी होतो आहे. त्यातही गुंतवणुकीसाठी पेपर सोन्याला पंसती मिळू लागल्याने मुहूर्ताच्या दिवशी फक्त वळ््याची खरेदी होत असल्याचे दिसून आले. सोन्याच्या गुंतवणुकीतील परतावाही कमी होत गेल्याने त्याचा आणि दराचा एकत्र परिणाम खरेदीवर झाल्याचे विक्रेत्यांचे म्हणणे आहे. घरांच्या किंमतीही मध्यमवर्गीयांच्या आवाक्याबाहेर गेल्याने, नव्या गृहप्रकल्पांसाठी पायाभूत सुविधांची वानवा असल्याने एकंदरीतच घरखरेदीवर त्याचा परिणाम होतो आहे. स्टॅम्प ड्युटी, रजिस्ट्रेशन फ्री, फर्निचर फ्री, घरावर दुचाकीची भेट अशा आॅफर्स असूनही चढ्या दरांमुळे घरांच्या खरेदीवरील मंदीचे मळभ दूर झालेले नाही. वाहनांच्या खरेदीचाही गेल्या सहा महिन्यांतील मंदावलेला वेग तसाच असल्याचे दिसून आले. आरटीओची कार्यालये सदऱ्यानिमित्त मुद्दाम उघडी असली तरी तेथेही फारशी गर्दी नव्हती. वाहनांचे केवळ बुकींग झाल्याने नोंदणीसाठी ग्राहक आरटीओत येण्यास वेळ लागेल, असे तेथील अधिकाऱ्यांनी सांगितले. अर्थात सोने, घरे, वाहने यांची खरेदी पूर्वीसारखी फक्त मुहूर्तावर होत नाही, तर ती आता वर्षभर सुरू असते. त्यामुळे मुहूर्ताच्या खरेदीचा ट्रेंड बदलतो आहे, असेही निरीक्षण विक्रेत्यांनी नोंदवले.
दसऱ्यानिमित्त केल्या जाणाऱ्या गृहपयोगी वस्तू, इलेक्ट्रॉनिक वस्तू, मोबाईल यांच्या खरेदी खरेदीसाठी दुकानांत ग्राहकांची झुंबड होती. आॅनलाईन खरेदीचा ट्रेंड वाढत असूनही ही गर्दी कायम होती. (टीम लोकमत)

सोन्याच्या नाण्यांना मागणी-

सोन्याची मंगळवारी ३० टक्के उलाढाल झाली. यंदा दागिन्यांपेक्षा सोन्याच्या नाण्यांना, वळ््याला अधिक मागणी होती. गेल्या सहा वर्षांत सोन्याला असलेल्या मागणीपेक्षा यंदाची मागणी सर्वात कमी मागणी आहे. जागतिक घडामोडीमुळे यंदा मागणी कमी असल्याचे आॅल इंडिया ट्रेड फेडरेशन असोसिएशनचे पदाधिकारी नितीन कदम यांनी सांगितले.

मुहूर्ताच्या घरखरेदीचा ट्रेंड बदलतोय!

घर खरेदीत आता पहिल्यासारखी परिस्थिती नाही. वर्षभर काही ना काही स्कीम दिल्या जात असल्याने दसऱ्याच्या मुहूर्तावर घरांची सरासरी २० टक्के खरेदी झाल्याची माहिती ठाण्यातील एमसीएचआयचे माजी अध्यक्ष मुकेश सावला यांनी दिली.
ठाण्याच्या विविध भागात सध्या नवी गृहसंकुले उभी राहत असली, तरी सर्वाधिक पसंती घोडबंदर भागात घर खरेदीला दिली जात आहे. कल्याण, अंबरनाथ, बदलापूर, शहापूर, कसारा आदी भागातील घरांच्या किंमतीवर जरी परिणाम झाला असला, तरी तसा परिणाम ठाण्यात झाला नसल्याचा दावाही त्यांनी केला.
पूर्वी दसऱ्याच्या मुहूर्तावर अथवा गुढीपाडव्याला घर खरेदीला पसंती दिली जात होती. परंतु आता विकसक ग्राहकांना वर्षभर ग्राहकांना वेगवेगळ्या स्किम देत असल्याने वर्षभर किंबहुना ज्याच्याकडे जसे पैसे येतील त्यानुसार घर खरेदी केली जात असल्याचेही सावला यांनी सांगितले.

महिलांची वाहनखरेदी अधिक-

यावेळी वाहनांचे बुकींग १ आॅक्टोबरपासून सुरू होते. आगाऊ बुकिंग केलेल्यांनी दसऱ्याच्या मुहूर्तावर वाहने घरी नेली. यंदा वाहनांच्या खरेदीत ना नफा ना तोटा अशी परिस्थिती दिसून आली. गेल्यावर्षी वाहनांची खरेदी साधारण ८० टक्के झाली होती. ती यंदा ६० टक्क्यांवर पोहोचली. यातही पुरूषांच्या तुलनेत महिलांनी वाहन खरेदी मोठ्या प्रमाणात केल्याचे विक्रेत्यांनी सांगितले.