मीरारोड - भाईंदर जवळील वसई खाडी रेल्वे पुलावर मंगळवारी रात्री महाविद्यालयीन विद्यार्थिनीचा मृतदेह आढळून आला . प्रेमविवाहाचे कारण आत्महत्या करण्यामागे असल्याचा संशय व्यक्त होत आहे . रेल्वे पोलिसांनी , लोकलच्या धडकेने तिचा मृत्यू झाल्याची माहिती दिली आहे . तर मुलीच्या कुटुंबीयांनी मात्र प्रेमप्रकरणातून तिची हत्या झाल्याचा आरोप केलाय .
विलेपार्ले महामार्गा जवळील संभाजी नगर मध्ये राहणारी शिल्पा यडलम पुट्टा ( 20 ) हिचा मृतदेह भाईंदर रेल्वे स्थानक जवळच्या वसई खाडी रेल्वे पुलावर मंगळवारी रात्री साडे आकाराच्या सुमारास आढळून आला .
शिल्पा हि कला शाखेच्या शेवटच्या वर्षात शिकत होती . तिच्या वडिलांना मंगळवारी रात्री 8 च्या सुमारास तिने फोन केला होता . एका मुलाशी आपले प्रेम असल्याचे तिने सांगितले होते . त्यावर वडिलांनी तू घरी ये , तुमचं लग्न लाऊन देऊ असे सांगितल्याचे निकटवर्तीयांचे म्हणणे होते . प्रेमप्रकरणातूनच आपल्या मुलीची हत्या करण्यात आली आहे . तिने जेव्हा कॉल केला तेव्हा आजूबाजूला मुलांचा आवाज येत होता असे कुटुंबीयांनी म्हटले .
रेल्वे रुळावरून तिला उचलून आणत असताना तिच्यात जीव होता . तिच्या फक्त डोक्यालाच जखम आहे . व तिचा मोबाईल देखील तिच्या हातातच होता असे तिला उचलून आणणाऱ्यांनी सांगितल्याचे तिचे कुटुंबीय सांगतात .
तर विरार कडे जाणाऱ्या लोकल च्या धडकेत ती मरण पावली . शिल्पा हि रेल्वे रुळावरून चालली होती व सतत हॉर्न वाजवून देखील ती बाजूला झाली नाही असे लोकलच्या चालकाने भाईंदर रेल्वे पोलिसांना कळवले होते असे वरिष्ठ निरीक्षक विलास चौगुले यांनी सांगितले .
पालकांच्या मागणी नुसार शिल्पाचा मृतदेह मुंबईच्या जे . जे . रुग्णालयात शवविच्छेदनासाठी पाठवला आहे . अकस्मात मृत्यूची नोंद केली असून चौकशी सुरु आहे असे ते म्हणाले . दरम्यान लोकल चालकाने दिलेली माहिती तसेच शिल्पाने प्रेम प्रकरण वा प्रेम विवाह वरून आत्महत्या केल्याची शक्यता सूत्रांनी व्यक्त केली आहे .