भिवंडीत फर्निचर गोदामाला भीषण आग, साहित्य जळून खाक

Huge Fire : घटनेची माहिती मिळताच अग्निशमन पथक घटनास्थळी दाखल होत आग आटोक्यात आणण्यासाठी शर्थीचे प्रयत्न करत आहेत.

नितिन पंडीत

भिवंडी : भिवंडीतील शांतीनगर परिसरात असलेल्या जब्बार कंपाउंड येथील फर्निचरच्या गोदामास भीषण आग लागल्याची घटना मंगळवारी सायंकाळी घडली आहे. या आगीत संपूर्ण गोदामातील फर्निचर साहित्य जळून खाक झाले आहे. घटनेची माहिती मिळताच अग्निशमन पथक घटनास्थळी दाखल होत आग आटोक्यात आणण्यासाठी शर्थीचे प्रयत्न करत आहेत.

या आगीचे नेमकी कारण अजून समजू शकले नसले तरी गोदामांच्या बाजूला टाकण्यात आलेल्या कचरा पेटविला असता या काचऱ्यातूनच गोदामाला आग लागली असावी अशी शंका स्थानिक नागरिक व्यक्त करीत आहे. सुदैवाने या आगीत कोणतीही जिवीत हानी झाली नसली तरी फर्निचर जाळून खाक झाल्याने मोठे नुकसान झाल्याचा अंदाज वर्तविण्यात येत आहे. या आगीच्या घटनेची नोंद शांतीनगर पोलीस ठाण्यात करण्यात आली आहे.