गेल्या काही वर्षांमध्ये गेमिंग इंडस्ट्री आणि तंत्रज्ञान खूप बदलले आहे. काही वर्षांपूर्वी सुपर मारिओ (Super Mario) आणि कॉन्ट्रासारखे (Contra) गेम्स एकाच कार्ट्रेजमध्ये येत होते. परंतु आता त्यांची जागा हाय क्वालिटी आणि मोठ्या ग्राफिक्स असलेल्या गेम्सनं घेतली आहे. हे परिवर्तन कम्प्युटर गेम्सपासून गेमिंग कन्सोलसारख्या प्लेस्टेशन एक्सबॉक्स पर्यंत आलं आहे. सध्या याची जागा आता स्मार्टफोन्सनं घेतली आहे. आज गेमिंग हे केवळ मनोरंजनाचं साधन नाही, तर याकडे एक उत्तम करिअर म्हणूनही पाहिलं जात आहे.
सध्याच्या काळात अनेक गेमर्स ऑनलाइन स्ट्रीमिंग करतात. यासाठी उत्तम इन्फ्रास्ट्रक्चर आणि हाय स्पीड इंटरनेटची आवश्यकता असते. आज भारत हा संपूर्ण जगात सर्वात मोठा गेमिंग हब आहे. याशिवाय देशात गेमिंग इन्फ्रास्ट्रक्चर तेजीनं वाढत आहे. अशातच आगामी काळात येणारं 5G तंत्रज्ञान यामध्ये मोठं परिवर्तन करेल असंही म्हटलं जात आहे. देशातील दुसऱ्या क्रमांकाची दूरसंचार कंपनी एअरटेलनं हे शक्य करून दाखवलं आहे. एअरटेलनं नुकतंच मानेसरमध्ये 5G लाईव्ह टेस्ट नेटवर्कवर क्लाऊ़ड गेमिंग डेमो सेशनचं आयोजन केलं होतं. याच्या निकालानं भविष्यातील अनेक मार्ग खुले केले आहेत.