'मोठ्या घरची राणी, मात्र बदनाम केलं हगवणेंनी..."; फॉर्च्युनर गाडीवरील मजकुराची सोशल मीडियावर चर्चा

करमाळ्यातील सामाजिक कार्यकर्ते अतुल खूपसे यांनी आपल्या फॉर्च्युनर गाडीवर लिहिलेल्या मजकुरामुळे सोशल मीडियावर चांगलीच चर्चा रंगली.

पुण्यातील वैष्णवी हगवणे आत्महत्या प्रकरण सध्या राज्यात चर्चेत आहे. वैष्णवीने हुंड्या प्रकरणी आत्महत्या केल्याचे समोर आले आहे, याआधी तिला मारहाण झाल्याचेही म्हटले आहे. वैष्णवीच्या वडिलांनी तिच्या लग्नात एक फॉर्च्युनर गाडी आणि ५१ तोळे सोने दिल्याचे सांगण्यात आले आहे. या फॉर्च्युनर गाडीची सध्या जोरदार चर्चा सुरू आहे. राजकीय वर्तुळातुनही या प्रकरणी आरोप-प्रत्यारोप सुरू आहे, आता सोलापुरातील अतुल खुपसे यांनी स्वत:च्या फॉर्च्यूनर गाडीवर एक मजकूर लिहिला आहे. हा मजकूर सोशल मीडियावर व्हायरल झालाय. 

लोकमतचा अग्रलेखः 'फॉर्च्युनर संस्कृती'चे भोग

सोलापूर जिल्ह्यातील करमाळ्यातील शेतकरी संघटनेचे नेते अतुल खुपसे यांनी त्यांच्या स्वत:च्या फॉर्च्युनर गाडीच्या मागील काचेवर हगवणे प्रकरणा संदर्भात मजकूर लिहिला आहे. 

फॉर्च्यूनरवरील मजकूर काय आहे?

"तशी तर मी मोठ्या घरची राणी मात्र बदनाम केलं मला हगवणे यांनी मी फॉर्च्युनर,माझा रुबाबच वेगळा,हगवणे कुटुंबामुळे नाव ठेवू लागलाय गाव सगळा. अतुल भाऊंनी मला रोखीत विकत घेतलंय, पण हगवणे मुळे फॉर्च्युनर जातीला लोकांनी धू धू धुतलंय, असा मजकूर अतुल खुपसे यांनी कारच्या मागच्या काचेवर लिहिला आहे. सध्या या मजकुराचा फोटो सोशल मीडियावर व्हायरल झाला आहे.

'हा मजकूर लिहिण्यामागे कारण की...'

फॉर्च्युनरवरील व्हायरल झालेल्या मजकुरासंदर्भात आम्ही अतुल खुपसे यांची प्रतिक्रिया घेतली. यावेळी अतुल खुपसे म्हणाले, "मी जनशक्ती शेतकरी संघटनेचं काम करतो, शेतकऱ्यांच्या प्रश्नांसाठी राज्यभर फिरावं लागतं. मी याआधी स्विफ्टमधून प्रवास करत होतो. माझी डाळींबाची शेती आहे. मी पैसे साठवून काही दिवसांपूर्वीच मोठी फॉर्च्युनर गाडी घेतली. मी गाडी रोख घेतली आहे, पण पुण्यातील हगवणे प्रकरणामुळे माझ्या गाडीकडेही लोक संशयाने पाहत आहेत. मी कुठेही गेलो तर आता मला गाडी कशी घेतली असं विचारतात. हगवणे यांच्यामुळे ही गाडीसुद्धा बदनाम झाली. म्हणून मी माझ्या गाडीवर हा मजकूर टाकून घेतला." राज्यात दुसरी वैष्णवी होऊ नये हीच इच्छा. मुलीच्या वडिलांनी मुलाचे कर्तृत्व पाहून मुलीचे लग्न केले पाहिजे, अगदी मुलगा शेतकरी असला तरी चालेल, असंही त्यांनी नमूद केलं.

नेमकं प्रकरण काय?

पुण्यातील राजेंद्र हगवणे यांची सून वैष्णवी हगवणे यांनी राहत्या घरी आत्महत्या केली. वैष्णवीच्या वडिलांनी ही आत्महत्या हुंड्यासाठी असल्याचा आरोप केला. तसेच वैष्णवीच्या शरीरावर मारहाणीच्या खूनाही सापडल्याचे सांगण्यात येत आहे. हगवणे यांनी दोन कोटींची मागणी केली होती, या पैशासाठीच वैष्णवीचा छळ केल्याचा आरोप तिच्या वडिलांनी केला आहे.