मंद्रूपच्या अपर तहसीलदार उज्ज्वला सोरटे यांची साताऱ्याला प्रशासकीय बदली

सोलापूर : मंद्रूपच्या अपर तहसीलदार उज्ज्वला सोरटे यांची प्रशासकीय बदली करण्यात आली. महाराष्ट्र राज्य शेती महामंडळाच्या साखरवाडी (फलटण) येथील स्थावर व्यवस्थापक पदावर त्यांची नियुक्ती झाली आहे.

मंद्रूप येथे नव्याने अतिरिक्त तहसील कार्यालय मंजूर करण्यात आले. या कार्यालयाच्या पहिल्या अपर तहसीलदार म्हणून तीन वर्षांपूर्वी उज्ज्वला सोरटे यांची निवड करण्यात आली. त्यांनी कार्यालयासाठी सोयीची जागा निश्चित केली. मंद्रूप येथील शासकीय धान्य गोदामात लाखो रुपये खर्च करून लोकवर्गणीतून सुसज्ज आणि सुशोभित अतिरिक्त तहसील कार्यालयाची उभारणी त्यांनीच केली. मात्र, स्थानिक लोकप्रतिनिधी आणि त्यांच्यात मतभेद झाले. विविध कारणांनी त्यांच्यावर आरोप करण्यात आले. २२ ग्रामपंचायतींनी त्यांच्या बदलीसाठी ठराव केले होते. साखरवाडी येथील शेती महामंडळाच्या रिक्त झालेल्या स्थावर व्यवस्थापक पदाचा तातडीने पदभार घ्यावा आणि मंद्रूप येथील पदभार एकतर्फी सोडावा, असेही आदेशात म्हटले आहे.

----