कुर्डूवाडी : माहेरहून पैसे आणले नाही म्हणून विवाहितेचा गळा दाबून खून करण्यात आल्याची घटना बुधवारी सकाळी ११ वाजता माढा तालुक्यातील शेडशिंगे येथे घडली. मोनिका सत्यवान गोंडगिरे (वय-२२) असे खून करण्यात आलेल्या विवाहितेचे नाव आहे.
याप्रकरणी पती सत्यवान, सासरा सूर्यभान आणि सासू सिंधू गोंडगिरे यांच्यावर कुर्डूवाडी पोलिसांनी गुन्हा दाखल केला आहे. १९ मे २०१४ ते ११ जुलै २०१८ या कालावधीत आरोपींनी मयत सोनिकाकडे माहेरहून पैसे आणण्याचा तगादा लावला होता. यावरुन तिचा शारीरिक आणि मानसिक छळ होत होता. बुधवारी सकाळी पुन्हा पैशावरुन आरोपींनी तिचा छळ केला. त्यानंतर दुपारी १२ वाजता पती सत्यवान याने आई-वडिलाच्या मदतीने तिचा गळा दाबून खून केला.
मयत मोनिकाचे वडील विलास गणपत भालेराव (वय-४७, रा. नेमतवाडी ता.पंढरपूर) यांनी कुर्डूवाडी पोलीस ठाण्यात रीतसर फिर्याद दिली आहे. तपास सपोनि केंद्रेकर हे करीत आहेत.