मंगळवेढा : सोलापूर येथील विराट मोर्चासाठी मंगळवेढा येथून शेकडो कार्यकर्त्यांना घेऊन निघालेल्या आ. समाधान आवताडे यांना मंगळवेढा सोलापूर महामार्गावर तिर्हे येथे पोलीस अधिकाऱ्यांनी रोखले. यावेळी आ. समाधान आवताडे आक्रमक झाले. त्यांनी महामार्गावर ठिय्या मारला.
आम्ही शांततेत मोर्चात सहभागी होणार आहोत, तरीही पोलिसांची अडमुठी भूमिका पाहून आ. समाधान आवताडे संतप्त झाले. सोबत कार्यकर्त्यांनी महामार्ग रोखून धरला. यावेळी कार्यकर्त्यांनी छत्रपती शिवाजी महाराज यांचा जयजयकार केला. आरक्षण आमच्या हक्काचे नाही कुणाच्या बापाचे अशा घोषणा देऊन परिसर दणाणून सोडला.
मराठा क्रांती मोर्चाच्या वतीने आज सोलापुरात मराठा आक्रोश मोर्चाचे आयोजन केले आहे. दरम्यान या मोर्चाला पोलिसांनी परवानगी नाकारली आहे. परवानगी नाकारली असतानाही मोर्चा काढण्यात येत असल्याने पोलिसांनी मोठा पोलिस बंदोबस्त तैनात केला आहे.