सोलापूर : वीज बिलाचा भरणा केलेल्या धनादेशाचा कोणत्याही कारणामुळे अनादर (चेक बाऊंस) झाल्यास ३५० रुपयांऐवजी आता १५०० रुपये दंड किंवा बँक चार्जेस यापैकी जी रक्कम जास्त असेल त्या रकमेचा दंड लावण्यात येणार आहे.
महावितरणने वीजदराच्या निश्चितीकरणासाठी दाखल केलेल्या मध्यावधी आढावा याचिकेच्या सुधारित आदेशामध्ये महाराष्ट्र विद्युत नियामक आयोगाने नुकतीच मंजुरी दिली आहे. १ डिसेंबरपासून या आदेशाची अंमलबजावणी करण्यात येत आहे. यापूर्वी वीज बिलापोटी दिलेला धनादेश कोणत्याही कारणासाठी बाऊंस झाल्यास वीजग्राहकांना ३५० रुपये दंड लावण्यात येत होता; मात्र आता १ डिसेंबरपासून १५०० रुपये किंवा बँक चार्जेस यापैकी जी रक्कम जास्त असेल तो दंड म्हणून लावण्यात येत आहे.
वीज बिल भरण्याच्या अंतिम मुदतीपूर्वी दिलेला धनादेश वटणे आवश्यक आहे. त्यानंतरच बिलाची रक्कम प्राप्त झाल्याची नोंद होते, परंतु अनेक वीजग्राहक अंतिम मुदतीच्या एक-दोन दिवसांपूर्वी धनादेशाद्वारे वीज बिलाची रक्कम भरतात.
धनादेश वटण्यास साधारणत: तीन ते चार दिवसांचा कालावधी लागू शकतो. त्यामुळे मुदतीनंतर वीज बिलाचा भरणा झाल्यास संबंधित ग्राहकांना धनादेशाद्वारे भरलेली रक्कम थकबाकी म्हणून पुढील बिलात लागून येते किंवा कोणत्याही कारणाने धनादेश बाऊंस झाला आर्थिक दंडासह वीजपुरवठा खंडित करण्याची कारवाई केली जाते. वीजदेयकांपोटी दिलेल्या चेक बाऊंसची विविध कारणे असली तरी प्रामुख्याने चुकीची तारीख टाकणे, खाडाखोड करणे, चुकीची स्वाक्षरी करणे आदी प्रकार दिसून येत आहेत.
आॅनलाईनवर भर द्या...च्महावितरणने घरबसल्या वीज बिल भरण्यासाठी वेबसाईट, मोबाईल अॅप किंवा ईसीएसद्वारे सोय उपलब्ध आहे. त्यामुळे धनादेशाऐवजी वीजग्राहकांनी या आॅनलाईन सुविधांचा लाभ घ्यावा, असे आवाहन महावितरणकडून करण्यात आले आहे.