मोहोळ : रस्त्याच्या कडेला उभ्या राहिलेल्या आयशर टेम्पोला पाठीमागून पिकप जीपने जोरदार धडक देऊन झालेल्या अपघातात दोघे जण जागीच ठार तर दोघे जण जखमी झाल्याची घटना शुक्रवार १३ मे २०२२ रोजी पहाटे ५ वाजता देवडी गावच्या शिवारात हॉटेल श्रीकृष्ण जवळ घडली.
याबाबत पोलिसांनी दिलेल्या माहितीनुसार, कल्याणहून सोलापूरकडे घराचे सामान घेऊन निघालेला आयशर टेम्पो क्रमांक एम.एच. ४३ बी. आर. ५२५२ हा शुक्रवार १३ मे रोजी पहाटे ५ वाजता देवडी गावचे शिवारात हॉटेल श्रीकृष्ण जवळ रस्त्याच्या कडेला उभा राहिला असता पाठीमागून भरधाव वेगात आलेली पिकप गाडी क्रमांक एम.एच. २० इ. एल ७२८२ या पिकअप गाडीने टेम्पोला पाठीमागून जोरदार धडक देऊन झालेल्या अपघातात रिजवान अब्दुल गणी शेख (वय २२, रा. वैजापूर औरंगाबाद ) व रिहान फैजल कयेशअल्ली (वय ३५, राहणार झारखंड) हे दोघे जागीच ठार झाले. तर पाठीमागे बसलेले दोघेजण जखमी झाले. दोन्ही जखमींना सोलापूर येथे उपचारासाठी पाठवून देण्यात आले असून याबाबत आयशर टेम्पो चा ड्रायव्हर चेतन बिभीषण खंदारे यांनी दिलेल्या तक्रारीनुसार मोहोळ पोलिस ठाण्यात गुन्हा दाखल करण्यात आला असून अधिक तपास आपघात पथकाचे ज्योतीबा पवार हे करीत आहेत.