सोलापूर: बाहेर जाऊन येतो असे सांगून घरातून गेलेल्या १४ वर्षीय मुलाचा, रविवारी पहाटेच्या सुमारास तुळजापूर रोडवर मृतदेह आढळून आला. या धक्कादायक प्रकारामुळे नागरिकांमध्ये भितीचे वातावरण निर्माण झाले आहे. विशाल विजय बट्टू (वय १४ रा. घोगंडे वस्ती) असे मृत झालेल्या मुलाचे नाव आहे. विशाल बट्टू हा घोंगडे वस्ती रहात होता, शनिवारी रात्री ८ वाजता तो बाहेर जाऊन येतो म्हणून घरातून बाहेर पडला. तो रात्री उशीर झाला तरी परत आला नाही.
घरच्यांनी शोधाशोध केली, मात्र तो कोठेही आढळून आला नाही. शेवटी घरातील लोकांनी जोडभावी पेठ पोलिस ठाण्यात धाव घेतली. विशाल निघून गेल्याची माहिती दिली. पहाटेच्या सुमारास तुळजापूर रोडवरील सर्व्हिस रोडवर मृतदेह पडल्याची माहिती पोलिसांना मिळाली. पोलिसांनी घटनास्थळी जाऊन पहाणी केली असता, तो मृतदेह विशाल बट्टू याचा असल्याचे निदर्शनास आले. मृतदेह शवविच्छेदनासाठी शासकीय रूग्णालयात दाखल करण्यात आले आहे. याची नोंद जोडभावी पेठ पोलिस ठाण्यात झाली आहे.