जेव्हा आपल्या लेकरांना वाचवण्याची वेळ तेव्हा आई ही एक योद्धा बनून लढताना आपण अनेकदा पाहिलं आहे. आईचं हे रूप फक्त मनुष्यांमध्येच नाही तर पक्षी आणि इतर प्राण्यांमध्येही बघायला मिळते. अशीच आई योद्घा झालेली दाखवणारा एक अंगावर शहारे आणणारा व्हिडीओ व्हायरल झाला आहे.
आयएफएस सुशांता नंदा यांनी 21मे रोजी एक व्हिडीओ शेअर केला असून हा व्हिडीओ वाऱ्याच्या वेगाने व्हायरल झाला आहे. लोक या बहादूर आईचं भरभरून कौतुक करत आहेत. या व्हिडीओत एक कोंबडी तिच्या पिलांचा बचाव करण्यासाठी थेट एका कोब्रासोबत भिडली आहे. ही कोंबडी तिची पिल्लं सुरक्षित ठिकाणी पोहोचेपर्यंत या फणा काढलेल्या कोब्रासोबत लढते.
यात बघायला मिळतं की, साप हळूच तिथे जाऊन पिल्लांची शिकार करण्याचा प्रयत्न करतो. पण त्यांची आई त्यांना वाचवण्यासाठी सापाशी भिडते. कोब्रा अनेकदा कोंबडीवर जीवघेणा हल्ला करतो, पण कोंबडी पिल्लं सुरक्षित ठिकाणी पोहचत नाही तोपर्यंत त्याला व्यस्त ठेवते.
या व्हिडीओच्या कॅप्शनला नंदा यांनी लिहिले की, 'बॅटल रॉयल, जेव्हा आई तिच्या लेकरांच्या रक्षणासाठी लढते तेव्हा तो मुकाबला आरपार असतो. इथे एक बहादूर आई कोब्रापासून तिच्या पिल्लांना वाचवते'. हा व्हिडीओ आतापर्यंत 15 हजार वेळा पाहिला गेला आहे.