Thief Viral Video : आजकाल तर चोर कुठून आणि कधी येतील याचा काहीच नेम नसतो. चोर येतात आणि सफाईदारपणे आपला खिसा कापून गायब होतात. मात्र, काही लोक असेही असतात जे वेळेचं भान ठेवत अशा घटना हाणून पाडतात. असंच काहीसं दाखवणारा एका व्हिडीओ सोशल मीडियावर व्हायरल झाला आहे. यात एका कॅफेमधील धक्कादायक घटना दाखवली आहे. एका महिला कॅफेमध्ये बसली होती, ती तिच्या लॅपटॉपवर काम करत होती. अचानक तिथे एक चोर येतो.
व्हायरल झालेल्या या व्हिडीओमध्ये तुम्ही बघू शकता की, कॅफेमध्ये बसलेली महिला आपल्या लॅपटॉपवर काम करण्यात बिझी होती. आजूबाजूचे लोक आपसात बोलत होते. तेव्हाच अचानक बाहेरून एक व्यक्ती हेल्मेट आणि कॅरी बॅग घेऊन कॅफेमध्ये येतो. बिझी असलेली महिलाही त्याच्याकडे बघत नाही. पण काही सेकंदात असं काही घडतं की तिला धक्का बसतो. तो व्यक्ती महिलेचा लॅपटॉप हिसकावतो आणि बाहेर जाऊ लागतो. अशावेळी महिलेने सतर्कता दाखवली आणि लॅपटॉपला लागलेला चार्जरचा वायर ओढला.
चोराने लॅपटॉप बरोबर पकडला नव्हता त्यामुळे त्याच्या हातून लॅपटॉप निसटला. महिलेने आपला लॅपटॉप परत घेतला. चोरी करायला आलेली व्यक्ती पुन्हा कॅफेमध्ये येते. तेव्हा तेथील सगळे लोक सतर्क होतात आणि चोरावर हल्ला करण्यासाठी खुर्च्या हाती घेतात. आता मात्र त्याला पळून जाण्याशिवाय पर्याय नव्हता. या घटनेचं सीसीटीव्ही फुटेज व्हायरल झालं आहे. हा व्हिडीओ ट्विटरवर @ViciousVideos ने शेअर केला आहे. आतापर्यंत या व्हिडीओला ३८ हजारांपेक्षा जास्त व्ह्यूज मिळाले आहेत.