दिल्ली विधानसभा निवडणुकीच्या निकालाचे कल हाती आले असून त्यानुसार 'आप' म्हणजेच आम आदमी पार्टीने जोरदार मुसंडी मारत आघाडी घेतली आहे. साऱ्या देशाचे लक्ष या निकालाकडे लागले होते कारण भाजपाने विजयासाठी दिल्लीत जोरदार मोर्चेबांधणी केली होती. पण त्यांनी लावलेला जोर आणि त्यांनी घेतलेल्या आघाडीत बरीच तफावत आहे. जरी निकाल पूर्णपणे हाती आले नसले तरी अपेक्षेप्रमाणे 'आप'चं दिल्लीत सरकार बसणार असल्याचं स्पष्ट चित्र आहे. त्यावरून सोशल मीडियात मीम्सही व्हायरल झाले आहेत.
भाजपाचे दिल्ली प्रदेशाध्यक्ष मनोज तिवारी यांनी भाजपा बहुमताने सत्तेत येईल आणि 55 जागा जिंकेल असा विश्वास व्यक्त केला होता. मनोज तिवारी यांनी 'मी या निकालाबाबत आजिबात चिंताग्रस्त नाही. आजचा दिवस भाजपासाठी चांगला असेल असा मला विश्वास आहे. आज आम्ही दिल्लीत सत्तेत येणार आहोत. भाजपाने 55 जागा जिंकल्यास आश्चर्य वाटायला नको' असं म्हटलं होतं. पण चित्र वेगळंच बघायला मिळालं. दिल्लीचे मुख्यमंत्री अरविंद केजरीवाल यांनी केलेल्या कामांना जनतेने साथ दिली आहे.