लग्न म्हटलं की जश्या रुढी, परंपरा तसंच धमालमस्ती, गाणं, डान्सही आलाच. लग्न नवरा नवरीचं जरी असलं तरी त्यात वऱ्हाडी अन् नातेवाईक यांचाच उत्साह जास्त असतो. आजकाल लग्नात डान्स करण्यासाठी हमखास डीजे लावला जातो. अन् त्यातही त्यावर फक्त वऱ्हाडीच फक्त नाचतात असं नाही बरं का, नवरा नवरीही अगदी स्वत:च्याच लग्नात जोरदार डान्स करतात. पण अशावेळी काही दुर्घटना घडली तर? एका लग्नात असंच काहीसं झालं ज्यात नवरा मोठ्या संकटातून वाचला.
डान्स फ्लोअरवर नवरा नवरी डान्स करण्यासाठी उभे होते. तिथं उपस्थित सर्व लोक त्यांना टाळ्या वाजवून प्रोत्साहन देत होते. काही लोक त्यांना आपल्या कॅमेऱ्यात टिपत होते. इतक्यात असं काही झालं की सर्वांचा काळजाचा ठोकाच चुकतो. नवरा-नवरी डान्स करायला सुरुवात करणारच की त्यांच्यावर धाडकन डीजेचा स्पीकर कोसळतो.
व्हिडीओत पाहू शकता नवरा-नवरी सुरुवातीला फोटो काढताना दिसतात. आता ते डान्स करणार तोच त्यांच्या मागे असलेला डीजेचा स्पीकरण पडतो तो थेट नवरदेवाच्या डोक्यावर. स्पीकरच्या धडकेने नवरदेव समोर ढकलला जातो तर नवरीबाई आपला जीव वाचवण्यासाठी उजव्या बाजूला पळते. तिथं उपस्थित इतर लोकही शॉक होतात.
नवरदेव आपलं डोकं चोळताना दिसतो. त्याच्या डोक्याला आणि पाठीला कदाचित मार लागला असावा पण मोठी दुखापत झाली नाही. @be_harami इन्स्टाग्राम अकाऊंटवर हा व्हिडीओ पोस्ट करण्यात आला आहे. व्हिडीओ पाहताच सुरुवातीला आपल्याही काळजाचा ठोका चुकतो. पण दुसऱ्याच क्षणी आपल्याला हसूही आवरत नाही. हा व्हिडीओ पाहून त्यावर मजेशीर कमेंटही येत आहेत.