जानवलीत कारच्या धडकेत दुचाकीस्वार महिलेचा मृत्यू, अपघातानंतर कार चालक पसार

कणकवली: मुंबई गोवा महामार्गावर जानवली, परबवाडी येथील फाट्यावर गोव्याकडून मुंबईच्या दिशेने जाणाऱ्या सिल्वर रंगाच्या स्विफ्ट कारने दुचाकीला मागून जोरदार धडक दिली. या अपघातात अंजली अमित साळवी ( ३६, रा. शिवाजीनगर, कणकवली) यांचा डोक्याला गंभीर दुखापत झाल्याने मृत्यू झाला आहे.हा अपघात गुरुवारी सायंकाळी ६ वाजण्याच्या सुमारास झाला.मुंबई गोवा महामार्गावर जानवली, परबवाडी येथे आपली बहिण नूतन दळवी यांना त्यांच्या घरी सोडण्यासाठी अंजली साळवी या दुचाकी घेवून गेल्या होत्या.  नूतन दळवी या दुचाकीवरुन खाली उतरल्यानंतर अचानक मागून आलेल्या भरधाव कारने दुचाकीला जोरदार धडक  दिली. अंजली साळवी यांना जवळजवळ वीस ते तीस फूट फरफटत घेऊन कारचालक कारसह पसार झाला. या अपघातात गंभीर जखमी झालेल्या अंजली साळवी यांना त्यांचे भावोजी ऍड .संतोष दळवी यांनी तत्काळ आपल्या कारमधून कणकवली येथील एका खाजगी रुग्णालयात  उपचारासाठी दाखल केले.  मात्र, उपचारापूर्वीच त्यांचा मृत्यू झाला असल्याचे डॉक्टरांनी सांगितले.या अपघाताचे वृत्त समजतात सहायक पोलिस निरीक्षक मनोज पाटील, पोलिस नाईक रुपेश गुरव,स्वप्निल जाधव,भूषण सुतार आदी घटनास्थळी दाखल झाले. त्यानंतर पंचनामा करून अंजली साळवी यांचा मृतदेह कणकवली उपजिल्हा रुग्णालयात शवविच्छेदन करण्यासाठी नेण्यात आला. या घटनेचे वृत्त समजताच कणकवली येथील खाजगी रुग्णालयात नागरिकांनी मोठी गर्दी केली होती. माजी उपनगराध्यक्ष कन्हैया पारकर,चेतन मुंज,चेतन अंधारी,बाळा पाटील,सिद्धेश बांदेकर,संकेत बांदेकर,भालचंद्र पाटील आदी नागरिक यावेळी उपस्थित होते. अंजली साळवी यांच्या पश्चात पती, दोन मुले, सासू, भाऊ ,बहीण, आई असा परिवार आहे.