सावंतवाडी : माडखोल येथे दोन दुचाकींमध्ये समोरासमोर झालेल्या अपघातात शिक्षक-शिक्षिका जखमी झाल्याची घटना मंगळवारी सकाळी साडेदहा वाजता घडली. ओव्हरटेक मारण्याच्या नादात हा अपघात झाला. जखमींवर येथील उपजिल्हा रुग्णालयात उपचार करण्यात आले.अनिल कृष्णा चव्हाण (४५, रा. माणगाव) व साक्षी कोरगावकर (३६, रा. सावंतवाडी ) अशी जखमींची नावे असून, साक्षी कोरगावकर या शिक्षिकेला डोक्याला दुखापत झाल्याने अधिक उपचाराकरिता तिला बांबोळी-गोवा येथे हलविण्यात आले.जखमी अनिल चव्हाण व साक्षी कोरगावकर या केसरी येथे जिल्हा परिषदेच्या शाळेत कार्यरत आहेत. दरम्यान, आज सकाळी दुचाकीवरून त्या शाळेत जात असताना माडखोल येथे समोरून येणाऱ्या दुचाकीस्वाराने चुकीच्या दिशेने येत धडक दिली. यात शिक्षक-शिक्षिका रस्त्यावर कोसळली. या अपघातात साक्षी कोरगावकर यांच्या डोक्याला दुखापत झाली, तर अनिल चव्हाण किरकोळ जखमी झाले.
जखमींना तत्काळ स्थानिकांनी उपचाराकरिता उपजिल्हा रुग्णालयात हलवले. तेथे प्राथमिक उपचार केल्यानंतर शिक्षिका कोरगावकर हिला अधिक उपचाराकरिता बांबोळी-गोवा येथे हलविण्यात आले.शिक्षक चव्हाण यांच्यावर उपचार करून घरी सोडण्यात आले. घटनेची माहिती समजताच रुग्णालयात शिक्षक वर्गाने धाव घेत विचारपूस केली. दरम्यान, अपघाताचा पंचनामा पोलीस हवालदार मंगेश शिंगाडे यांनी केला. त्यानुसार पोलीस ठाण्यात अपघाताची नोंद करण्यात आली आहे.