सावंतवाडीत अपक्षांकडून राणे, केसरकरांना धक्का, लक्षवेधी लढतींमध्ये मारली बाजी, बडे राणे समर्थक पराभूत

Sindhudurg Zilha Parishad Election Result: राज्यातील जिल्हा परिषद आणि पंचायत समितीच्या मतमोजणीमध्ये अनेक ठिकाणी धक्कादायक निकाल लागताना दिसत आहेत. सिंधुदुर्ग जिल्ह्यातील सावंतवाडी तालुक्यामध्ये भाजपा आणि शिंदेसेनेच्या महायुतीला बंडखोर आणि अपक्षांनी जोरदार धक्का दिल्याचे आतापर्यंतच्या कलांमधून दिसत आहेत.

राज्यातील जिल्हा परिषद आणि पंचायत समितीच्या मतमोजणीमध्ये अनेक ठिकाणी धक्कादायक निकाल लागताना दिसत आहेत. सिंधुदुर्ग जिल्ह्यातील सावंतवाडी तालुक्यामध्ये भाजपा आणि शिंदेसेनेच्या महायुतीला बंडखोर आणि अपक्षांनी जोरदार धक्का दिल्याचे आतापर्यंतच्या कलांमधून दिसत आहेत. त्यात संपूर्ण जिल्ह्याचं लक्ष लागलेल्या कोलगाव आणि माडखोल जिल्हा परिषद गटांमध्ये अपक्ष उमेदवारांनी भाजपाच्या अधिकृत उमेदवारांना पराभूत करत बाजी मारली आहे. कोलगावमधून अपक्ष उमेदवार मायकेल डिसोझा यांनी विजय मिळवला आहे. तर माडखोलमध्ये अपक्ष उमेदवार शिवानी संजय नाईक या विजयी झाल्या आहे.

एकेकाळी राजकीय दृष्ट्या संवेदनशील मानल्या जाणाऱ्या सिंधुदुर्ग जिल्ह्यात या निवडणुकीसाठी भाजपा आणि शिंदेसेनेने महायुती केली होती. मात्र या महायुतीला अनेक ठिकाणी बंडखोर आणि अपक्षांनी आव्हान दिल्याचं चित्र दिसत होतं. सावंतवाडी तालुक्यातील कोलगाव जिल्हा परिषद गटात राणे समर्थक असलेले भाजपाचे स्थानिक नेते महेश सारंग विरुद्ध अपक्ष मायकेल डिसोझा यांच्यात लढत झाली होती. अटीतटीच्या झालेल्या या लढतीत अपक्ष मायकेल डिसोझा यांनी बाजी मारली. 

तर माडखोल जिल्हा परिषद गटामध्येही अपक्षांनी प्रस्थापित नेत्यांना पराभवाचा धक्का दिला आहे. येथे तीनही जागांवर अपक्षांनी बाजी मारली. माडखोल जिल्हा परिषद गटामध्ये अपक्ष उमेदवार शिवानी नाईक यांनी विजय मिळवला. तर माडखोल पंचायत समिती गणामध्ये अपक्ष अवनी राऊळ यांनी बाजी मारली आहे. तर कलंबिस्त पंचायत समिती गणामध्ये अपक्ष  उमेदवार प्रथमेश सावंत हे विजयी झाले आहेत.

या दोन मतदारसंघांसोबतच सावंतवातील तळवडे जिल्हा परिषद गटामध्ये भाजपाचे संदीप गावडे आणि उद्धवसेनेचे रूपेश राऊळ यांच्यात मुख्य लढत झाली होती. या लढतीत संदीप गावडे यांनी विजय मिळवला आहे.