कणकवली : कणकवली शहरातील मराठा मंडळ रोडवर असलेल्या क्रिस्टल रेसिडेन्सी बिल्डींग मधील तब्बल दहा फ्लॅट चोरट्यांनी एकाच वेळी फोडले. आज, शनिवारी पहाटेच्या सुमारास ही घटना घडली. चोरीच्या या घटनेमुळे एकच खळबळ उडाली. दरम्यान, फ्लॅट फोडत असताना इतर लोक राहत असलेल्या फ्लॅटच्या दरवाजाना बाहेरून कडी घालून घेत चोरट्यानी सावधगिरी बाळगली.ही बाब काहींच्या लक्षात येतात फ्लॅटमधील काही लोकांनी आरडाओरड केली. यादरम्यान त्यांनी आणि तेथे राहत असलेल्या या बिल्डिंग मधील एका फ्लॅट धारकाने चोरट्यांना अडवण्याचा प्रयत्न केला. मात्र चोरट्यानी तिथे असलेल्या विटा या नागरिकांवर भिरकावत हल्ला केला. चोरटे पळून जाताना अडवण्याचा प्रयत्न केला असता त्यांनी आपल्या हातातील कटावणीने हल्ला करण्याचा प्रयत्न केला.चोरटे पळून जात असताना सीसीटीव्ही कॅमेऱ्यात कैद झाले आहेत. घटनेची माहिती मिळताच नगरसेवक व युवा सेना जिल्हाप्रमुख सुशांत नाईक यांनी तत्काळ घटनास्थळी धाव घेत नागरिकांशी चर्चा केली. तसेच याबाबत पोलिसांना देखील माहिती दिली. पोलिसांनी घटनास्थळी धाव घेत तपास सुरु केला आहे. चोरट्यांनी नेमका कितीचा मुद्देमाल लंपास केला याबाबत अद्याप माहिती मिळू शकली नाही.
कणकवलीत चोरट्यांची दहशत, एकाचवेळी फोडले दहा फ्लॅट; नागरिकांवर हल्ल्याचा प्रयत्न
By सुधीर राणे | Updated: September 24, 2022 11:54 IST