नितेश राणेंसह 19 जणांना 23पर्यंत न्यायालयीन कोठडी, उद्या जामीन अर्जावर सुनावणी

आमदार नितेश राणे यांच्यासह १९ आंदोलकांच्या पोलीस कोठडीची मुदत संपल्याने त्यांना मंगळवारी कणकवली न्यायालयात हजर करण्यात आले.

कणकवली : महामार्ग प्राधिकरण उपअभियंता प्रकाश शेडेकर यांच्यावर चिखलफेक केल्याप्रकरणी आमदार नितेश राणे यांच्यासह १९ आंदोलकांच्या पोलीस कोठडीची मुदत संपल्याने त्यांना मंगळवारी कणकवलीन्यायालयात हजर करण्यात आले. न्यायालयाने त्यांना २३ जुलैपर्यंत न्यायालयीन कोठडी सुनावली आहे. दरम्यान, सर्व संशयित आरोपींनी जामीन मिळावा म्हणून जिल्हा व सत्र न्यायालयात अर्ज सादर केला असून, त्यावर बुधवार १0 जुलै रोजी सुनावणी होणार आहे.कणकवली येथे ४ जुलै रोजी महामार्ग दुरवस्थेवरून महामार्ग प्राधिकरण उपअभियंता प्रकाश शेडेकर यांच्यावर आंदोलकांनी चिखलफेक करीत गडनदी पुलाला बांधून ठेवण्याचाही प्रयत्न केला होता. याबाबत तक्रार शेडेकर यांनी ४ जुलै रोजी सायंकाळी कुडाळ पोलीस ठाण्यात नोंदविली होती. त्यानुसार नितेश राणे यांच्यासह १८ स्वाभिमान कार्यकर्त्यांना अटक झाली होती. यामध्ये कणकवली नगराध्यक्ष समीर अनंत नलावडे(४५, कणकवली ), उपनगराध्यक्ष रवींद्र गायकवाड(४५, कणकवली), संजय मधुकर कामतेकर(४६, कणकवली ), राकेश बळीराम राणे(३५, कणकवली ), अभिजित भास्कर मुसळे(४२, कणकवली ), निखिल आचरेकर(३६ ,कणकवली ), राजन श्रीधर परब(५४, कणकवली ), संदीप रमाकांत सावंत (३५, वागदे), लक्ष्मण संभाजी घाडीगांवकर ( ४२, वागदे ), संदीप चंद्रकांत मेस्त्री ( ३६, कलमठ ), सदानंद उर्फ बबन गोविंद हळदिवे(६०, फोंडाघाट), किशोर जगन्नाथ राणे(५२, कणकवली ), शिवसुंदर शाहू देसाई(२४, कणकवली), सचिन गुणाजी पारधिये(३६, कळसुली ), विठ्ठल दत्ताराम देसाई(५५, कणकवली), मिलिंद चंद्रकांत मेस्त्री(३५, कलमठ ), संदीप बाळकृष्ण नलावडे(३६, कणकवली ) यांचा समावेश होता. तर माजी नगराध्यक्षा मेघा अजय गांगण (४२, कणकवली ) यांना शुक्रवारी सकाळी अटक करण्यात आली होती. या १९ जणांवर शासकीय कामात अडथळा, कटकारस्थान रचणे, रस्ता अडविणे यासह अन्य गुन्हे दाखल करण्यात आले होते.५ जुलै रोजी आमदार नितेश यांच्यासह अटकेतील सर्व आंदोलकांना कणकवली न्यायालयात हजर केले असता न्यायालयाने ९ पर्यंत ५ दिवसांची पोलीस कोठडी सुनावली होती. या पोलीस कोठडीची मुदत मंगळवारी संपत असल्यामुळे दुपारी ३ वाजण्याच्या सुमारास सर्व संशयितांना कणकवली न्यायालयात हजर करण्यात आले.कडेकोट पोलीस बंदोबस्तकणकवली न्यायालयातून सर्व आंदोलकांची सावंतवाडी येथील कारागृहात रवानगी करण्यात आली आहे. दरम्यान, कायदा आणि सुव्यवस्था राखून अनुचित प्रकार टाळण्यासाठी जिल्हा पोलिस प्रशासन काटेकोर काळजी घेत असून मंगळवारी सकाळपासूनच कणकवली न्यायालय परिसरात कडेकोट बंदोबस्त ठेवण्यात आला होता. न्यायालय परिसरात स्वाभिमानच्या जिल्ह्यातील पदाधिकारी आणि कार्यकर्त्यांनी मोठी गर्दी केली होती.पाच जणांवर होणार वैद्यकीय उपचारतसेच नितेश राणे, मेघा गांगण, संजय कामतेकर, विठ्ठल देसाई, राकेश राणे यांनी प्रकृती ठीक नसल्याने वैद्यकीय उपचार मिळावे, अशी मागणी न्यायालयाकडे केली. न्यायालयाने ती मागणी मान्य करत सावंतवाडी येथील कारागृह प्रमुखांना संबंधितांवर वैद्यकीय उपचार करावेत, असे आदेश दिले आहेत. त्यानुसार वरील पाच जणांना सावंतवाडी येथील उपजिल्हा रुग्णालयात दाखल करण्यात आले.जामीन अर्जावर उद्या सुनावणी१९ आरोपींची न्यायालयीन कोठडी ठोठवल्यानंतर आरोपीच्या वतीने अ‍ॅड. संग्राम देसाई यांनी जिल्हा सत्र न्यायालयात जामिनासाठी अर्ज दाखल केला. कारण भा.दं. वि. ३५३ कलमानुसार दाखल गुन्ह्यात जामिनासाठी जिल्हा न्यायालयात अर्ज दाखल करावा लागतो. त्यानुसार बुधवारी जामिन अर्जावर सुनावणी होणार आहे. या गुन्ह्यात जिल्हा न्यायालयाकडून पोलीस निरीक्षक शिवाजी कोळी यांचे म्हणणे ऐकून घेतले जाणार आहे. त्यानंतरच जामीन अर्जावर सुनावणी होऊन संबंधित आरोपींना जामिन देण्यात येणार आहे.