खारेपाटण : मुंबई - गोवा महामार्गावर खारेपाटणपासून अगदी जवळ असलेल्या नडगिवे या घाटीत एका अवघड वळणावर कार (एम. एच. 0७ पी. ९९७७) या मालवण येथून आलेल्या व चिपळूण येथे जाणाऱ्या चारचाकी वाहनाला पाठीमागून येणाऱ्या मोठ्या अवजड मालवाहू ट्रकने जोरदार धडक दिली. यामुळे अपघातात चारचाकी गाडीतील वाहनचालकासह एकूण ८ जण जखमी झाले आहेत. हा अपघात गुरुवारी दुपारी १२ च्या दरम्यान घडला.अपघातातील जखमी व्यक्तींवर खारेपाटण प्राथमिक आरोग्य केंद्र येथे तातडीने उपचार करण्यात आले. अपघातात जखमी झालेल्या व्यक्तींमध्ये पावनी नीलकंठ मालंडकर (१३), साईश मोहन कुसवेकर (१४), वैशाली गजानन कुडाळी (४८), दीपक धर्माजी जाधव (४९), दिग्गज दीपक जाधव १४), हिमानी जगदीश येरम (१५), ईशान नितीन वेंगुर्लेकर (१३), रंजन रानोजी साठे -वाहनचालक (२५, सर्व राहणार मालवण) यांचा समावेश आहे.मालवण टेबल टेनिस ॲकॅडमी येथून विठ्ठलराव जोशी चॅरिटेबल ट्रस्ट आयोजित युथ गेमसाठी चिपळूण डेरवण येथे प्रशिक्षकासह मुले कारने चालली होती. दरम्यान, महामार्गावर नडगिवे या गावी जिल्हा परिषद केंद्र शाळा नं. १च्या समोर एकदिशा मार्गावर गोवा येथून आलेला व दमन येथे अवजड माल घेऊन जाणारा ट्रकचा (क्र. जीजे २७, एक्स ५८०४) ब्रेक निकामी झाल्याने वाहनचालक जितेंद्र यादव (२१, रा. उत्तरप्रदेश -प्रतापगड) याने पुढे चालणाऱ्या कारला पाठीमागून जोरदार धडक दिल्यामुळे गाडी उलटी होऊन अपघात झाला.अपघात एवढा भीषण होता की गाडीचे फार मोठ्या प्रमाणात नुकसान झाले आहे. मात्र, सुदैवाने कोणतीही जीवितहानी झालेली नाही; परंतु चारचाकी गाडीतील ८ व्यक्ती किरकोळ जखमी झाल्या.
चालकाच्या हाताला दुखापत झाली, तर एका मुलीच्या डोक्याला मार बसला. अपघाताची माहिती मिळताच खारेपाटण सरपंच रमाकांत राऊत, उपसरपंच इस्माईल मुकादम, सदस्य महेंद्र गुरव, भाऊ राणे, बबन तेली यांनी घटनास्थळी भेट देऊन अपघातात जखमी व्यक्तींना तातडीने खारेपाटण प्राथमिक आरोग्य केंद्रात आणण्यास मदत केली. त्यामुळे त्यांच्यावर उपचार करण्यात आले.मुंबई - गोवा महामार्गावर खारेपाटणपासून जवळ असलेल्या नडगिवे घाटीत चारचाकी वाहनाचा अपघात झाला. (छाया : संतोष पाटणकर )