Sindhudurg: सोनाळीत वृद्ध महिलेचा निर्घृण खून, नराधमाकडून अतिप्रसंगाचे कृत्य; वैभववाडी तालुका हादरला 

घटनास्थळी पोलिसांनी नराधमाच्या शोधासाठी श्वानपथक बोलवून तपास केला

वैभववाडी : तालुक्यातील सोनाळी वाणीवाडी येथे ७० वर्षांच्या वृद्धेवर अज्ञाताने अतिप्रसंग करून निर्घृण खून केल्याची घटना घडली आहे. जयश्री रामदास साटम-थोटम (६५) असे या मृत महिलेचे नाव आहे. मंगळवारी रात्री पावणेआठच्या सुमारास घडलेल्या या घटनेमुळे तालुका हादरला आहे. घटनास्थळी पोलिसांनी नराधमाच्या शोधासाठी श्वानपथक बोलवून तपास केला.याबाबत घटनास्थळावरून मिळालेल्या माहितीनुसार जयश्री साटम या सोनाळी येथे एकट्याच राहत होत्या. त्यांचा मुलगा कुटुंबासह नावळे येथे वास्तव्यास आहे. रात्री पावणेआठच्या सुमारास सरपंच भीमराव भोसले जयश्री यांच्या घरी गेले तेव्हा त्यांच्या घराचा दरवाजा आतून बंद होता. मात्र, दरवाज्याबाहेर त्यांना पुरुषाचे चप्पल दिसले. त्यामुळे जयश्री यांना भोसले यांनी अंगणातूनच हाक मारली. मात्र, आतून प्रतिसाद मिळाला नाही. त्यामुळे त्यांनी दरवाजा ढकलला असता जयश्री या रक्ताच्या थारोळ्यात विवस्त्रावस्थेत आढळून आल्या तेव्हा त्यांची अखेरची घरघर सुरू होती.हे दृश्य पाहून भांबावलेल्या भोसले यांनी शेजारच्यांना हाक मारली परंतु तिथून प्रतिसाद न मिळाल्याने ते आपली दुचाकी घेऊन वाडीत माहिती देण्यासाठी गेले. तिथून ते घटनास्थळी परतले तेव्हा जयश्री साटम यांच्या दरवाज्याबाहेरची ती चप्पल गायब होती. त्यामुळे भोसले यांनी पोलिस पाटील रावराणे यांच्यामार्फत पोलिसांना घटनेची माहिती दिली. त्यामुळे पोलिस आणि वैद्यकीय यंत्रणा तातडीने घटनास्थळी पोहोचले.पोलिसांनी घरात तसेच आजूबाजूच्या शेतासह जंगलात जाऊन शोध घेतला. मात्र, तो नराधम आढळून आलेला नाही. घटनास्थळावरील परिस्थितीवरून त्या नराधमांने अतिप्रसंग करून जयश्री यांचा निर्घृण खून केल्याचा प्राथमिक अंदाज आहे. या घटनेमुळे वैभववाडी तालुका हादरुन गेला आहे.