निवकणेच्या जानाई देवीची यात्रा रद्द

निवकणेतील यात्रेत फक्त मानाच्या पालख्यांचे मानकरी व स्थानिक मानकरी आणि पुजारी यांच्या उपस्थितीत धार्मिक कार्यक्रम पार पाडले जाणार आहेत. भाविकांनी यात्रेसाठी येऊन गर्दी करु नये. प्रशासनाला सहकार्य करावे, असे आवाहन देवस्थान समिती व ग्रामपंचायत निवकणे यांच्या वतीने करण्यात आले आहे. निवकणेतील जानाई देवीची वार्षिक यात्रा २२ व २३ मार्च या कालावधीत होणार आहे. यासाठी तहसीलदार योगेश्वर टोम्पे व सहायक पोलीस निरीक्षक चौखंडे यांनी यात्रा समिती व ग्रामस्थांची बैठक घेऊन यात्रेत फक्त धार्मिक कार्यक्रम प्रथेप्रमाणे मानकऱ्यांच्या उपस्थितीत करण्याचे आवाहन केले. कोरोनाचा वाढता प्रादुर्भाव लक्षात घेता जानाई देवीचे मानकरी, विविध गावच्या सासनकाठ्या व मानाच्या पालख्यांचे मानकरी यात्रेतील धार्मिक कार्यक्रम पार पाडणार आहेत. तशा सूचना व निरोप मानकऱ्यांना देण्यात आले असून जानाई देवीच्या भाविकांनी यात्रा कालावधीत निवकणे गावी गर्दी करू नये. नियमांचे उल्लंघन करू नये, असेही देवस्थान समिती व ग्रामपंचायतीने आवाहन केले आहे.