भरतगाव वाडीजवळ अपघातात महिला ठार; युवक जखमी

नागठाणे : पुणे-बेंगलोर राष्ट्रीय महामार्गावर भरतगाववाडी गावचे हद्दीत एका दुचाकीस मालट्रकने दिलेल्या धडकेत मंगळवारी रात्री झालेल्या भीषण अपघातात एक महिला ठार तर, एक युवक गंभीर जखमी झाला आहे. सारिका तानाजी मोहिते (वय ३२ वर्ष) रा. नागठाणे ता. सातारा असे मयत महिलेचे नाव असून वैभव विलास सकटे (वय १९) रा. अंगापूर, ता. सातारा असे जखमी युवकाचे नाव आहे. याबाबत एका अज्ञात मालट्रक चालकावर गुन्हा दाखल करण्यात आला आहे.

बोरगाव पोलिसांकडून मिळालेल्या माहितीनुसार पुणे-बेंगलोर राष्ट्रीय महामार्गावर सातारा ते कराडकडे जाणाऱ्या मार्गावरून सोमवार दि. २१ रोजी रात्री ९ वा. च्या सुमारास वैभव सकटे हा युवक शेंद्रे येथून आपली आत्या हिला दुचाकी क्र. एमएच ११ डीसी ४१५२ वरून घेऊन नागठाणे येथे सोडण्यासाठी निघाला होता. भरतगाववाडी गावचे हद्दीत आले असताना एका शिवशाही बसला चुकीच्या बाजूने ओव्हरटेक करून मालट्रक चालक भरधाव वेगाने पुढे आला आणि त्याने समोरून निघालेल्या दुचाकी गाडीस जोराने धडक दिली. ही धडक इतकी भीषण होती की त्यावेळी दुचाकीवर बसलेली महिला जोराने रस्त्यावर पडली आणि मालट्रकच्या चाकाखाली सापडल्याने जागीच मृत झाली. दुचाकीचालक युवकही खाली पडल्यामुळे तोही गंभीर जखमी झाला. तसेच दुचाकीचेही मोठ्या प्रमाणावर नुकसान झाले. अज्ञात मालट्रक चालकाने तेथे न थांबता मालट्रकसहित तेथून पोबारा केला.

घटनेची माहिती मिळताच हायवे बिट चारचे सचिन पोळ, पी. सी. शिंदे, बी. आर. नदाफ, बोरगाव पोलीस ठाण्याचे किरण निकम, उत्तम गायकवाड, राहुल भोये, कपिल टिकोळे यांनी घटनास्थळी धाव घेऊन जखमी युवकास उपचारासाठी नागठाणे आरोग्य केंद्रात पाठवून दिले. रस्त्यावरील वाहतूक एका बाजूने सुरळीत करून दिली. याबाबतची तक्रार वैभव सकटे यांनी बोरगाव पोलीस ठाण्यात दिली असून, अधिक तपास सपोनि डॉ. सागर वाघ करत आहेत.