सातारा : जिल्ह्यात पावसाची उघडीप असून २४ तासांत नवजा येथे दोन तर महाबळेश्वरला एक मिलीमीटरची नोंद झाली. त्यातच धरणक्षेत्रात ही पावसाची विश्रांती आहे. यामुळे कोयना धरणात येणाऱ्या पाण्याची आवकही पूर्णपणे थांबली आहे. पाणीसाठा ८७.४५ टीएमसीवर स्थिर आहे.जून आणि जुलै महिन्यात जिल्ह्यात पावसाने चांगली हजेरी लावली. पण, ऑगस्ट महिना सुरू होताच पावसाने सुटी घेतल्यासारखी स्थिती आहे. पश्चिम भागातीलच कास, बामणोली, तापोळा, कोयना, नवजा, महाबळेश्वरसह कांदाटी खोऱ्यात तुरळक प्रमाणात पाऊस पडत आहे. त्याचबरोबर कोयनेसह धोम, बलकवडी, कण्हेर, तारळी आणि उरमोडी धरण पाणलोट क्षेत्रातही पावसाने ब्रेक घेतला आहे. त्यामुळे धरणातील पाणीसाठ्यात मोठी वाढ होताना दिसत नाही.बुधवारी सकाळपर्यंतच्या २४ तासांत कोयनानगर येथे पाऊस पडल्याची नोंद नाही. नवजा आणि महाबळेश्वरला किरकोळ नोंद झाली. त्याचबरोबर प्रमुख धरण क्षेत्रातही पावसाची उघडीप आहे. कोयना धरणात येणाऱ्या पाण्याची आवक थांबली आहे. सकाळच्या सुमारास धरणात ८७.४५ टीएमसी पाणीसाठा होता. त्यामुळे धरण भरण्यासाठी अजून १७ टीएमसी पाण्याची गरज आहे. तर सध्या धोम धरणात १२.५९ टीएमसी पाणीसाठा झालेला आहे. बलकवडीत ३.७६, कण्हेर ९.४४, उरमोडी धरणात ९.३८ आणि तारळी धरणात ५.१६ टीएमसी पाणीसाठा झालेला आहे. ही प्रमुख धरणे सुमारे ८६ टक्के भरली आहेत. तर या धरणांत पूर्ण पाणीसाठा होण्यासाठी अजूनही २० टीएमसी पाण्याची आवश्यकता आहे.
महाबळेश्वरला ३,५६८ मिलीमीटर पर्जन्यमान..जिल्ह्यात मागील दोन महिन्यापासून पाऊस सुरू आहे. आतापर्यंत सर्वाधिक पर्जन्यमानाची नोंद पाथरपूंज येथे झालेली आहे. त्यानंतर महाबळेश्वर येथे ३ हजार ५६८ तर नवजाला ३ हजार ४४५ आणि कोयनानगरला ३ हजार ७३ मिलीमीटरची नोंद झालेली आहे. यावर्षी पावसाचे प्रमाण कमी आहे.